D'OGBL-Presidentin war en Donneschdeg de Moien eis Invitée vun der Redaktioun.

Den Debat iwwert Steiergerechtegkeet geet virun an d’Geeschter deele sech: D’Presidentin vum OGBL Nora Back konnt en Donneschdeg de Moien hei op RTL nëmme staunen iwwert d’Ausso vum Luc Frieden e Mëttwoch hei op der Antenn. De fréieren CSV- Finanzminister a President vun der Chambre de Commerce sot, datt Lëtzebuerg een “extrem sozial gerechte Steiersystem” hätt. “Ech fannen et verréckt, datt een esou eng Ausso ka maachen“, sou d’Nora Back.

All déi schaffend Leit an hir Famillje wéissten, datt Lëtzebuerg net vill Steiergerechtegkeet hätt, esou d’Presidentin vum OGBL. Dat geséich ee bei den elengerzéiende Familljen an tëscht de verschiddenen Akommesschichten. Dem Nora Back no missten d’Barèmen nach méi progressiv ginn – also méi héich Tauxen, wat ee méi verdéngt - an „an der Mëtt misst een et strecken“. Datt déi 5%, déi am meeschte verdéngen, ronn d’Hallschent vun de Recette vun der Akommessteier bezuelen, géing hirer Meenung no „d’Schiflag vun der Verdeelung“ weisen. Eng Schiflag gesäit d’Nora Back och bei der Besteierung vu Kapital. Dee géing net besteiert ginn ewéi d’Aarbecht. Als Beispiller huet d’Nora Back d’Aktien, Dividenden, Grondsteier an Immobiliëfongen genannt, mä och d’Stock Options. Si versteet net firwat d’Regierung do nach näischt ënnerholl huet.

De Problem vum Logement wier och « explosiv ». D’ganz Gesellschaft géing ufänke sech ze wieren: „d’Leit si rosen, d’Leit si frustréiert“, sou d’Nora Back. D’Wunnpräisser géingen d’Kafkraaft opfriessen. Kafkraaft a Steiergerechtegkeet sinn zwee Elementer déi den OGBL sech an der Ried zur Lag vun der Natioun d’nächst Woch erwaarden. Donieft ass et awer och d’sozial Ofsécherung. Fir d’Gewerkschaft féiert de Wee aus der Kris nëmmen iwwert eng Aarbechtsplaz. D’Nora Back sot, d’Aarbechtsrecht misst reforméiert ginn fir de „Maintien dans l’emploi“ méi contraignant ze maachen an esou méi Sozialpläng ze vermeiden. Donieft plädéiert den OGBL dofir, datt de spezielle Regime vum Chômage partiel wéinst dem Covid iwwert den 31. Dezember eraus verlängert gëtt, well d’Kris nach laang net eriwwer wier.

Op d’Fro, wéi een d’Kris an d’Hëllefsmesure soll finanzéieren, huet d’Nora Back par konter ee manner negatiivt Bild gezeechent: Et misst ee sech net ze vill op d’Fro vum "budgetären Reequilibrage"  fokusséieren. Den Ausmooss vun der Kris wier elo awer nach net genee bekannt an d’Wuesstemsprevisioune vum Statec awer dach guer net esou negativ. Wat awer kloer ass fir den OGBL: op kee Fall dierf gespuert ginn. A wann ee vu Steiere schwätzt. Jo, wéi d’Nora Back sot: op kee Fall Kafkraaft schwächen, mä Kapital méi besteieren.

Invité vun der Redaktioun: Nora Back

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.