D'Inneministesch war e Freideg de Moien eis Invitée vun der Redaktioun.

En vue vun enger Reform vun der Grondsteier schafft den Inneministère „ganz intensiv drun“, fir „eng realistesch a gerecht Bewäertung vun den Terrainen ze maachen“. Dat huet d'LSAP-Inneministesch Taina Bofferding e Freideg de Moien hei op RTL matgedeelt. Amplaz ewéi bis ewell ze kucken, wat um Terrain steet, wéilt een elo eng Formel op d'Been stellen, fir d'Baupotential ze berechnen. D'Ministesch huet erkläert, dat wier méi gerecht, well aktuell Ackerland, dat an de Perimeter kënnt, d'selwecht bewäert gëtt, egal ob et um Kierchbierg wier oder am Norde vum Land. „Dat ass net richteg an do musse mer adaptéieren“, esou d'Taina Bofferding. Donieft géing een Instrument ausgeschafft ginn, fir all Joer de Wäert automatesch nei ze berechnen.

Op d'Fro, ob no Joerzéngten Attente d'Grondsteierreform nach dës Legislaturperiod kënnt, wollt d'Taina Bofferding net mat Jo oder Nee äntweren, mä: „ech kann Iech garantéieren, datt mir am Gaange sinn drun ze schaffen an alles drusetzen, fir nach en Text op den Dësch ze leeën.“

Baulandverträg a Virkafsrecht

D'Virkafsrecht vun de Gemengen – d’Méiglechkeet fir en Terrain, deen zum Verkaf steet, virum privat Marché selwer ze kafen – gouf vum Verwaltungsgeriicht gekippt. Do géing weider un enger Reform geschafft ginn. De Logementsministère ass a Kontakt mat de Gemengen.

D'Baulandverträg – ee Projet, dee virgesäit, datt Terrainen, déi an de Perimeter kommen, bannent engem gewëssen Delai musse viabiliséiert ginn, soss erëm a Gréngzon reklasséiert ginn, do wier een am Gaangen un Amendementer ze schaffen.

Ee weidert Puzzelstéck am Logement ass den Artikel 29 vum Gesetzprojet fir de „Pacte logement 2.0“. Hei ass virgesinn, datt e gewëssen Deel vun engem Bauprojet fir bezuelbare Wunnraum reservéiert gëtt an d'Gemengen, soss de Staat d’Recht huet, et ze kafen. Op d'Fro, wéi do d'Bewäertung soll technesch gemaach ginn, sot d'Taina Bofferding, do géingen déi reell Käschte gekuckt ginn, fir d'Realisatioun vun engem Projet. D'Plus-value géing net mat aberechent ginn.

Kritik vu Syvicol iwwert d'Gemengefinanzen

Wéinst dem Covid verléieren d'Gemengen eng 420 Milliounen Euro dëst Joer. D'Fuerderung vum Gemengesyndikat, datt d'Subside fir d'Gemenge méi transparent a realistesch solle ginn, huet d'Inneministesch relativiséiert: „D'Gemenge wäerte weider bestoen, se wäerten net Faillite goen“. D'Taina Bofferding sot, d'Gemengen géingen och méi Recetten erakréien, wann d'Situatioun gutt wier an ebe manner, wa se schlecht ass.

Do, wou eppes ka gemaach ginn, wäert eppes gemaach ginn, sou d'Ministesch awer weider. Zum Beispill bei den Investitiounen. D'Subside wieren no uewen adaptéiert ginn, sou datt se méi generéis ausfalen. Dat géing och retroaktiv spillen, also och fir Dossieren, déi schonn ugangs dës Joers erakomm sinn. Et wier nämlech wichteg, datt d'Gemenge weiderhin investéieren an zur Relance vun der Ekonomie bäidroen.

Invité vun der Redaktioun: Taina Bofferding

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.