De President vun der Horesca war e Freideg de Moien eisen Invité vun der Redaktioun.

Eng Fermeture wier fir eis eng Katastroph, et wier den Doud fir d'Entreprisen, seet den Alain Rix. De President vun der Federatioun vun den Hotelieren, Restaurateuren a Cafetiere war eisen Invité vun der Redaktioun. Mat Bléck op déi aktuell Zuele wier d'Angscht viru méi strengen Covid-Restriktioune grouss.  

Am Horesca-Secteur wieren et just wéineg Infektioune ginn, sengen Informatioune no wiere just e Grapp voll Betriber betraff gewiescht an d'Prozedure wieren do iwwerall agehale ginn. D'Horesca mécht awer den Appell un d'Personal, sech weider strikt un d'Reegelen ze halen a sech och testen ze loossen. Etablissementer, déi sech net un d'Covid-Reegelen halen, sollten haart bestrooft ginn, sou den Alain Rix.

Wéi grouss d'Pertë sinn, wier schwiereg ze chiffréieren. Allerdéngs géinge Stater Hotelle sech bekloen, datt bis zu 80% an de Keese géinge feelen, well et kee Business-Tourismus gëtt.

De Bong vu 50 Euro wier awer e grousse Succès, vun deem virun allem den Norden an Oste profitéiert hätten.

Bei de Restaurante géinge virun allem déi Betriber leiden, déi vum Mëttesgeschäft liewen. Den Teletravail wier allzäit fir d'Horesca eng Katastroph.

Déi staatlech Aidë wiere gutt a wichteg, allerdéngs kéint et net sinn, datt et 3 Méint dauert, bis Hëllefen ausbezuelt ginn.

Invité vun der Redaktioun: Alain Rix

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.