E Dënschdeg de Moie war den Aarbechtsminister a Vizepremier eisen Invité vun der Redaktioun.

Et war an ass d’Haapt-Hëllefsmesure fir d’Economie: de spezielle Regime vu Chômage partiel wéinst dem Covid, d’Kuerzaarbecht. D’Mesure gëtt iwwert den 31. Dezember eraus verlängert, fir wéi laang ass nach net gewosst. Den LSAP-Aarbechtsminister Dan Kersch sot en Dënschdeg de Moien hei op der Antenn, datt dat mat de Sozialpartner (Patronat a Gewerkschaften) zesummen decidéiert gëtt. De Minister sot, hie wier zouversiichtlech, datt Léisunge fonnt ginn „ouni awer op der anerer Säit d’Suen mam Reech eraus ze schären“.

Och de Chômage partiel kascht eppes: de Fonds pour l’emploi huet bis Juli eleng méi ewéi 800 Milliounen Euro ausbezuelt. Zwar hunn elo just nach eng 3.000 Betriber Kuerzaarbecht am Verglach zu de 14.000 um Héichpunkt vun der Kris. De Fonds pour l’emploi gëtt duerch d’Solidaritéitssteier alimentéiert. Fro un den Dan Kersch: muss déi Steier (déi 2010 vun 2,5 op 4 respektiv 6% gehéicht gi war) nach emol an d’Luucht goen? Nee et gëtt aktuell keen Drock, sou den Aarbechtsminister. D’Participatioun vum Staat un de Fonds pour l’emploi géing awer wuel iwwert 100 Milliounen Euro dëst Joer klammen.

De Chômage partiel war vereinfacht ginn a bleift vereinfacht fir d’Sekteuren Evenementiel, Horesca an Tourismus, déi kloer Abousse wéinst de Restriktiounen hunn. Den Dan Kersch huet d’Instrument gelueft, well et verhënnert, datt Betriber a Faillite geroden oder Leit am Chômage landen. Aner Betriber kéimen awer och a Fro, mä et gi Konditiounen: Wann déi Betriber och Leit entloossen, da sinn e plan de maintien dans l’emploi respektiv e plan de redressement Flicht.

Op d’Fuerderung vun der Handwierkerfederatioun, datt Net-Aarbecht an all Secteur soll zu 80% indemniséiert ginn, also och beim Staat war et ee klore „Nee“ vum Aarbechtsminister. Den Dan Kersch sot et wier net de Moment fir ee Secteur géint deen aneren auszespillen. Dausende vu Beamten hätte wärend der Kris méi geleescht ewéi se a normalen Zäite gefrot ginn, esou de Minister. Donieft géing d'Handwierkerfederatioun och 80% beim Krankeschäin verlaangen, wat och eng Verschlechterung fir de Privatsecteur géing duerstellen.

D’Independanten, déi krute jo kee Chômage partiel, dofir awer Enveloppë vun 2.500 respektiv 5.000 Euro. Den Dan Kersch huet awer an Aussiicht gestallt, datt nach eppes nokéim, sou wéi de Premier dat a senger Ried zur Lag vun der Natioun sot. Detailer gouf et nach keng.

Invité vun der Redaktioun: Dan Kersch

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.