E Mëttwoch de Moie war den Nach-President vun der UEL eisen Invité vun der Redaktioun.

Net un d'Streidereien, mä un dat, wat ee mat de Sozialpartner zanter dem Ausbroch vun der Corona-Kris fäerdeg bruecht hätt, dorunner wéilt hie sech erënneren. Dat sot den Nicolas Buck am RTL-Interview um Mëttwoch de Mueren. Hien hält jo als Enn vum Joer als Chef vun der Unioun vun den Lëtzebuerger Entreprisen (UEL) op.

Den Nicolas Buck ass houfreg iwwert den Sozialdialog, wéi en elo funktionéiert. Et hätt ee souguer fäerdegbruecht, de Wirtschafts- a Sozialrot erëm ze beliewen. D'Vertrauen tëscht de Sozialpartner wier elo besser ewéi 2019, wéi den Accord iwwert den Teletravail vun en Dënschdeg géing weisen. Och mam Aarbechtsminister Dan Kersch hätt hien eng gutt professionell Relatioun. D’Corona-Kris hätt gewisen, datt wann et haart op haart kënnt, Regierung, Gewerkschaften a Patronat d’Stäerkt hätten, pragmatesch Léisunge ze fannen. Den Nicolas Buck hofft, datt een deen Esprit bäibehält, fir och déi laangfristeg Problemer no der Kris ze léisen.

Et kann ee sech ëmmer ënner Partner Mol opreegen an déi aner hunn dann eng Kéier nogelauschtert. An dann muss een de Fong an d’Form trennen, sou de Nicolas Buck.

„De Kuch méi grouss maachen“

Déi grouss Fro fir d‘Land wier dem Nicolas Buck no, wéi een de Wuesstem, deen hie senge Kanner och wënscht, virbereet an organiséiert. "Mir alleguer an d’Politik, déi d’Verantwortung huet", hätten net gegleeft, datt d’Land sech ekonomesch, mä och demografesch esou entwéckelt, ewéi déi lescht 25 Joer. Dowéinst wier d’Land ëmmer hannendran um Niveau vun den Infrastrukturen, vun den Autobunnen oder nach vum bebaubare Perimeter.

Et géing vill vu Groussregioun geschwat ginn, den Nicolas Buck schwätzt léiwer vu „Grouss-Lëtzebuerg“ oder „Grand Luxembourg“. Et misst een definéieren, wéi een d’Main d’oeuvre fënnt, wou se wunne kommen a wou se schaffen. Den Nach-President vun der UEL huet drop higewisen, datt just 10% vum Territoire bebaut wier an „et ass net esou, wéi wa mir keng Plaz méi hätten an et kënnen aner grouss Stied nach an deem Land entstoen“.

Ob méi Infrastruktur net op Käschte vun der Ëmwelt geet? Dozou sot de Nicolas Buck: „dat hänkt dovunner of, wéi eng Zort vun Auto op der Autobunn fiert“. Op d’Ausso, et géingen ëmmer méi Leit net méi vum Lëtzebuerger Modell profitéieren, sot hien: „Dir sot dat elo esou vereinfacht. Dat ass eng héisch politesch Fro“. Et géing dem Nicolas Buck drëm goen ze decidéieren „wéi deelen ech de Kuch op“. Den Entreprisen hire Bäitrag wier de Kuch méi grouss ze maachen. Datt et an enger maartwirtschaftlecher Ekonomie vill Effizienz, mä dofir och „heiansdo Ongerechtegkeeten“ géing ginn, ass net ze leegnen. Mä „dat ass net de Sujet hei. De Sujet ass : wéi kann de Kuch wuessen a wéi organiséieren ech en?"

Invité vun der Redaktioun: Nicolas Buck

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.