En Freideg de Moie war d'Direktesch vun der Centrale paysanne Invitée vun der Redaktioun.

Den Accord vun den EU-Landwirtschaftsministeren dës Woch iwwert d’gemeinsam europäesch Agrarpolitik fir no 2020 ass de beschten Accord deen nach konnt zustane kommen. Dat sot d’Direktesch vun der Bauerenzentral Josiane Willems um Freideg de Moien hei op RTL. Duerch deen Accord géingen awer kloer nach zousätzlech Oploe fir d’Bauere kommen.

D’Subventiounspolitik fir d’Baueren gëtt elo nach tëscht den europäeschen Institutioune verhandelt. D’EU-Parlament freet beispillsweis, datt 30% vun de Subsiden un Ëmweltkritäre gebonne ginn amplaz 20%. Déi Gréng am EU-Parlament soen dat géing souguer net duergoen, well de gréissten Deel vun de Subsiden un der Fläch gebonne wier.

D’Josiane Willems sot, si hofft, datt et bei 20% bleift, woubäi am Fong schonn all d’Subsiden schonn u Krittäre gebonne wieren. Vun den 370 Milliarden Euro op 7 Joer wier ee ganzen Deel scho fir ländlech Entwécklung virgesinn. Déi 240 Milliarden, déi fir direkt Payementer virgesi sinn, déi wieren u strikt Oploe gebonnen. Et gouf schonn d'"cross compliance" an de „greening“, sou d'Josiane Willems. An der Vergaangenheet hätte Lëtzebuerger Baueren hir Subventioune gekierzt kritt, well se op d’mannst en Deel vun den EU-Critèren net erfëllt haten. Elo kéim nach déi „nei Conditionalitéit“ an d‘“Ökoreegelungen“, sou d’Direktesch vun der Bauerenzentral. "Mir kënnen d’Landwirtschaft ofbauen, mir kënnen nëmmen nach Biodiversitéit maachen", huet d’Josiane Willems bewosst iwwerdriwwen. D’Baueren wéilten méi ekologesch sinn, mä se missten awer och nach wirtschafte kënnen.

Der Bauerenzentral soll och nach méi an d’Fuerschung investéiert ginn. D’Josiane Willems huet déi Gréng opgefuerdert sech net d’office géint Alternativen ewéi zum Beispill „Präzisiounslandwirtschaft“ ze wieren. Wichteg wier et, datt d’Zil vun der Agrarpolitik net aus dem Bléck verluer gëtt, nämlech d’Liewensmëttelsécherheet ze garantéieren.

Hëllef wéinst dem Covid

Am Zesummenhang mat der Coronakris ass d’nächst Woch en Dënschdeg e Landwirtschaftsdësch fir iwwert eng Hëllef vum Staat fir d’Baueren a Wënzer ze verhandelen. Besonnesch d’Fleeschproduktioun géing ënnert der Kris leiden. D’Regierung huet 5 Milliounen an Aussiicht gestallt, wouvunner 2 Milliounen Euro schonn an Aktiounen engagéiert gi wieren, esou d’Josiane Willems. D’Direktesch vun der Bauerenzentral sot awer „et wäert knapps ginn, fir alles z’entschiedegen wat u Perten enstanen ass.“

Invité vun der Redaktioun: Josiane Willems

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.