En Dënschdeg de Moie war de stellvertriedende Porte-Parole vun der Covid-19-Task-Force eisen Invité vun der Redaktioun.

E Corona-Infizéierten ouni Symptomer riskéiert genee sou ustiechend ze si wéi e Kranken, deen zum Beispill houscht an néitscht. Mir hunn d'Donnéeën aus der 1. Phas vum Large Scale Testing analyséiert a mir gesinn do kee groussen Ënnerscheed bei der Iwwerdroung vum Virus, dat sot en Dënschdeg de Moien de Professer Paul Wilmes vun der Covid-19 Task Force. Hie war eisen Invité vun der Redaktioun.

D'nächst Woch soll déi ganz wëssenschaftlech Analys vum Lëtzebuerger groussflächegen Testing publizéiert ginn. Et géif kloer weisen, datt ee seng Kontakter limitéiere misst, sou de Paul Wilmes. Jidderee kéint ustiechend sinn, well e keng oder nach keng Symptomer huet. Dowéinst wär et och grad elo ganz wichteg, fir beim Large Scale Testing matzemaachen.

D'Resultater vun de Kläranlage vun der leschter Woch sinn och guer net gutt. De Virus geet nämlech vun de Fäkalien an d’Waasser iwwer. Do weist sech, wéi vill Leit de Virus effektiv hunn. D'Wäerter si 4 Mol méi héich wéi am Abrëll. D'Fuerscher ginn dovunner aus, datt d'Donkelziffer vun de positive Fäll 4 Mol méi héich ass wéi déi aktuell Zuel vun den Infektiounen.

Resumé vum Invité vun der Redaktioun
En Dënschdeg de Moie war de stellvertriedende Porte-Parole vun der Covid-19-Task-Force eisen Invité vun der Redaktioun.

Dës Woch wäert decisiv sinn, da géif ee gesinn, wou et hi geet. Déi aktuell Well hätt een awer virausgesinn an elo wier ee kloer an enger Acceleratioun, esou de Paul Wilmes. An de leschte Projektioune rechent ee mat 1.400 Neiinfektioune pro Dag Mëtt November. Mat den Zuele vu leschter Woch an de Weekend iwwer kéint dat awer nach klammen.

Wat d'Wëssenschaftler beonrouegt, ass déi héich Prevalenz an der Populatioun. Vill Leit hunn also de Moment de Virus, och ouni et ze wëssen. Mir si lo an der 3. Well dran a mir musse Mesuren huelen, fir et anzedämmen, warnt de Fuerscher.

Et wier ee liicht optimistesch. D'Regierung misst an hätt jo och Mesurë geholl. A wann d'Leit hiert Verhalen och adaptéieren, d'Covid-Restriktiounen a Recommandatioune respektéieren, kéint dat hëllefen, d'Well ze briechen.

Et wéilt ee keen neie Lockdown. Mä, wann een d'Pandemie awer elo net géif an de Grëff kréien, da gëtt d'Marge de Manoeuvre kleng.

Et wier also e kollektiven Effort néideg, all eenzele wier gefuerdert, sou nach den Appell vum Paul Wilmes vun der Covid-19 Task Force. Jidderee wier gefuerdert. De Professer huet un d'Leit appelléiert, méi ze maachen, wéi déi nei Moossnamen et virschreiwen. 7 bis 10 Deeg dauert et, bis een d'Verhalensännerunge vun de Leit och bei den Zuele vun Neiinfektioune mierkt.

Invité vun der Redaktioun: Professer Paul Wilmes

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.