En Donneschdeg de Moie war de Vizepremier eisen Invité vun der Redaktioun.

Mir sinn an enger Situatioun, wou mer net wësse wéi se sech entwéckelt. Soubal se ännert, géif reagéiert ginn. D'Regierung wier a stännegem Kontakt fir ze handelen. Dat sot den LSAP-Vizepremier Dan Kersch um Donneschdeg de Moien am RTL-Interview, hie war eisen Invité vun der Redaktioun. Am Verglach mam Ausland wier Lëtzebuerg um Mëttelwee, an an der Kontinuitéit.

Déi Leit, déi elo kritiséieren, datt net éischter méi streng Mesuren decidéiert goufen, wieren déi, déi virdru begréisst hunn, datt keng koumen.

D'Decisiounen, déi een hëlt, wieren un déi jeeweileg Situatioun ugepasst. Wann d'Situatioun sech verschlëmmert, missten zousätzlech Mesure kommen, sot de Minister Kersch ganz däitlech.

Dowéinst misst een elo nach kee Lockdown decidéieren.
D'Situatioun op Plazen a Spideeler a Frankräich an an Däitschland wier méi dramatesch wéi hei. Soubal ee mierkt, datt eng nei Situatioun entsteet, huele mer nei Mesuren, huet de Vizepremier ënnerstrach.

D'Ausgangsspär, déi kënnt vun owes 23 bis moies 6 Auer, wier eng drastesch Mesure. Dowéinst géif se via Gesetz, mat der Chamber also, decidéiert ginn, sou den Dan Kersch, an net iwwert en Etat de crise.

Datt ënnert anerem am Fleege- a Gesondheetssecteur d'Aarbechtszäite verlängert ginn, wier néideg, fir am Fall wou gesetzlech an der Rei ze sinn. Als Aarbechtsminister hofft hien, datt ee mat anere Moyenen iwwert d'Ronne kéim.

Am Sport gëllt jo elo och déi „4er-Reegel“. Natierlech wär dat eng Risen-Erausfuerderung fir déi ganz Sportswelt, gëtt den Dan Kersch als Sportsminister zou. An der 1. Well war de Sport ganz verbueden. Do wär ee kritiséiert ginn, et misst ee méi differenzéiert un d'Saach eru goen. Elo géif een dat probéieren. Déi méi kleng Gruppe vu 4 wär eng gutt Kompromëssléisung, déi et erlaabt datt all Alterskategorien weider kënne Sport maachen. Am Ausland ass deels de Sport komplett verbuede ginn.

Detailer gëtt et am en Donneschdeg um 17 Auer op enger Pressekonferenz.

Invité vun der Redaktioun: Dan Kersch

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.