En Dënschdeg de Moie war de President vun der Aleps eisen Invité vun der Redaktioun.

D'Pandemie verdäitlecht nach emol d'Penurie, op déi mir scho joerzéngtelaang opmierksam maachen, dat sot de Gilles Evrard, de President vun der Association vun den Enseignante fir Santésberuffer.

Den Ament sinn 30% vum Fleegepersonal Lëtzebuerger, de Rescht kënnt aus dem Ausland. Wéi vill Leit genee feelen a wéi vill mer der méi missten ausbilden, dat wie schwéier ze chiffréieren, sou de Gilles Evrard.

D'Penurie wier global, se géing sech an alle Santésberuffer weisen.
Successiv Regierungen hätten net nogelauschtert. Leider géing och de Minister Meisch um "brevet de technicien supérieur" festhalen. D'Aleps dogéint fuerdert scho méi laang eng Bachelor-Karriär fir Infirmièren an Infirmieren, fir de Beruff opzewäerten a méi attraktiv ze maachen. An anere Länner wier dat och esou. Leider kriten d'Santésberuffer zu Lëtzebuerg och net déi Unerkennung, déi se géinge verdéngen.

Beim Engagement vun LTPS-Schüler an der réserve sanitaire misst séchergestallt sinn, datt d'Ausbildungsobjektiver och weider kéinte suivéiert ginn, an der éischter Well wier dat e Problem gewiescht.
Trotzdeem wier et fir déi meescht eng gutt Experienz gewiescht. An den nächste Woche géing sech weisen, ob et lo och an der zweeter Well en Engagement wäert ginn.

Invité vun der Redaktioun - Gilles Evrard

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.