En Donneschdeg de Moie war de Chef vun „Luxembourg for Finance“ eisen Invité vun der Redaktioun.

D'Finanzplaz Lëtzebuerg kënnt verhältnisméisseg gutt duerch d'Kris, dat well villes Online ka gemaach ginn a well vill op Télétravail kann zeréck gegraff ginn. Dat seet de Chef vun der Agence „Luxembourg for Finance“, Nicolas Mackel.

De Brexit wier schlecht, allerdéngs hätte bal 80 Finanzinstitutiounen decidéiert, Aktivitéite vu London op Lëtzebuerg ze deplacéieren, d'Hallschent dovunner wieren Acteuren aus der Fongenindustrie.

Déi Fongenindustrie wier entretemps iwwregens scho bal d'Réckgrat vun der Finanzplaz. Mir wieren Nummer 2 op der Welt, no den USA. Mir wiere Virreider gewiescht, hätten eis fréi spezialiséiert an dofir kéinte mir d'Pole Position an Europa halen.

„Luxembourg for Finance“ huet zu Lëtzebuerg eng Campagne lancéiert, fir d'Finanzplaz beim Grand Public besser bekannt ze maachen.

Invité vun der Redaktioun: Nicolas Mackel

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.