E Mëttwoch de Moie war den Direkter vun der KuFa eisen Invité vun der Redaktioun.

Déi éischt Covid-Well hätt een nach gutt iwwerstanen. Am Summer hätt een souvill Cliente gehat wéi nach ni virdrun, well een am Géigesaz zu de Saisone virdrun, op bliwwe wier. Déi zweet Well ze packe wier awer elo méi schwiereg. Terrasse sinn zou, derbäi kommen d'Covid-Restriktiounen, déi verschidden Evenementer praktesch onméiglech maachen. Dat sot de René Penning, den Direkter vun der Escher Kulturfabrik, um Mëttwoch de Mueren am RTL-Interview.

Keng Existenz-Ängscht

Ëm seng Existenz misst een als subventionéiert Haus awer net fäerten. Aktuell ass d'KuFa zu 40 Prozent vun der Stad Esch an zu 29 Prozent vum Kulturministère finanzéiert. Et hätt een och kënne vun den Hëllefe vum Staat profitéieren, notamment dem Chômage partiel, ma et wär aktuell trotzdeem schwéier fir den Impakt vun der Coronakris op d'Finanzen anzeschätzen. Den Auto-Finanzement vun der KuFa läit bei 30 Prozent, ma et hätt een scho gemierkt, dass Recettë géinge feelen, erkläert de René Penning.

Organisatioun ass schwiereg

Den Ament kéint een och bal näischt plangen, et wär eng navigation à vue. Et géinge Leit elo scho vun Evenementer schwätze fir Abrëll 2021, mä dat wär den Ament sou weit fort. Momentan géing een Woch fir Woch kucken, doriwwer eraus, wär net vill méiglech. Dat géing et natierlech schwéier maachen, fir nei Projeten z'entwéckelen, déi eréischt an 2-3 Méint ufänken. Psychologesch wier d'Sanitär Kris awer sécherlech eng Belaaschtung. Speziell fir d'Personal, dat am Chômage Partiell ass a léiwer géif schaffe kommen a well een net wéisst wéi et weider geet.

Kultur a Krisen-Zäite wichteg fir Froen opzewerfen

De Secteur vun der Kultur an dem Evenementiel wier ganz fragil. Se wären déi éischt, déi confinéiert goufen an déi lescht déi de-confinéiert goufen an dobäi wär een mol ni komplett aus dem Deconfinement erauskomm. Kultur wier eppes extrem Wichteges fir eis Gesellschaft an awer géing een och haut gesinn, dass se op politeschem Plang net ëmmer déi Opmierksamkeet géing kréien, déi se verdéngt.
 
Eng positiv Säit hätt d'Corona-Kris awer, esou den Direkter vun der KuFa. An zwar d'Entschleunegung. Well soss war de Kalenner vun der Escher Kulturfabrik nämlech extrem gutt gefëllt.  Elo géif een e bësse Loft kréien.

Keen politescht Engagement méi

De René Penning ass politesch engagéiert bei der LSAP. Hie souz 2017 9 Méint am Escher Gemengerot an huet do den Evry Wohlfahrt ersat. Engersäits hätt d'KuFa duerch dëst politescht Engagement un Unerkennung gewonnen, erkläert den Direkter. Hien hätt vill nei Leit an vill Servicer kennegeléiert, wat gehollef hätt fir Dieren opzemaache bei neie Projeten. Op der anerer Säit wär et komplizéiert, fir an der nämmlechter Gemeng ze schaffen an dann och nach an engem Betrib, dee Subventioune vun der Gemeng kritt. An der Kultur wär een Ekippe-Geescht do, an der Politik wär et awer ganz individuell an et géing direkt perséinlech ginn an et kéim eriwwer wéi eng perséinlech Attack. An dat wär extrem geféierlech, wanns de och nach ee Budget an Subventioune misst verdeedegen.
Als Direkter vun der KuFa, déi eng Millioun Euro vun der Escher Gemeng kritt, kéint hie sech dofir net nach eemol opsetzen – a wann dann just hannert de Kulissen.

Invité vun der Redaktioun: René Penning

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.