En Donneschdeg de Moie war d'Coordinatrice vum Cesas eis Invitée vun der Redaktioun.

D'Pandemie an d'Covid-Mesuren hu sécher en negativen Impakt op dat sexuellt an affektiivt Verhale vun de Leit. Se hunn villäicht awer och dozou gefouert, dass Leit méi dorobber oppassen. Dat sot d'Coordinatrice vum Cesas, dem nationalen Zenter fir affektiv an sexuell Gesondheet, am RTL-Interview um Donneschdeg de Mueren. D'Christa Brömmel war ons Invitée vun der Redaktioun.

De Cesas promouvéiert eng positiv an respektvoll Haltung zur Sexualitéit an zu sexuelle Bezéiungen. Vulnerabel Gruppe wäre meeschtens a Krisenzäiten nach eemol méi staark betraff. Hei wären et besonnesch jonk an eeler Leit. Dass d'Online-Offer a Corona-Zäite verstäerkt genotzt ginn, muss net just negativ sinn. Mä et géif drop ukommen, wat konsuméiert gëtt. Natierlech hätt och zum Beispill BeeSecure an enger Campagne drop opmierksam gemaach, dass d'online verschécke vun Fotoe ka geféierlech sinn, oder dass ee selwer kéint Affer gi vun Predateuren, déi sech als Jonker oder Kanner ausginn an do mat hinnen a Kontakt trieden zum Beispill wa se Spiller spillen, erkläert d'Christa Brömmel.

Abus sexuel vu Mannerjäregen u Mannerjäregen
D'Zuel vun den Affäre viru Geriicht wéinst kannerpornographeschem Material ass an d'Luucht gaangen. Een Drëttel vun den Täter wäre mannerjäreg. Dat géing och den Cesas mat Schrecken zur Kenntnis huelen, wéi d'Christa Brömmel betount. Do wier vill Sensibilisatiouns- an Informatiounsaarbecht néideg. Engersäits fir déi Professionell, déi mat de Kanner a Jugendleche schaffen, fir déi op spezifesch Signaler ze sensibiliséieren. An anerersäits fir Organisatiounen, déi d'Affer betreien. Et hätt een och am Oktober eng nei Broschür erausgi mat Detailer iwwer all d'Acteuren, déi an deem Beräich täteg sinn, dass ee weess u wien ee sech ka wenden, sou d'Coordinatrice vum Cesas. Donieft wier et wichteg, net méi vun Kannerpornografie ze schwätzen, dat géing et verharmlosen, esou Christa Brömmel. Et wär besser vu sexuellem Abus vu Kanner ze schwätzen. Et misst ee wierklech op seng Wieder oppassen.

Wat mecht de Cesas?
De Cesas ass keng Ulafstell, mä versicht d'Expertise aus de verschiddenen Domainen ënnert sech ze regroupéieren. D'Regierung hätt sech fir d'zweete Kéier fir e Promotiounsplang entscheet, deen déi affektiv a sexuell Gesondheet soll promouvéieren, an den Cesas wär do, fir dat ëmzesetzen. De Cesas géing am Hannergrond agéieren an zum Beispill an der Formatioun vun den Acteuren aus der éischter Rei schaffen, also deene Leit, déi duerno mat den Zilgruppe schaffen, also zum Beispill Kanner, Jonken, eeler Leit oder Leit mat enger Behënnerung.

Den Cesas hutt dann och vum 7. -11.Dezember fir zweete Kéier eng Sensibilisatiounswoch iwwer déi sexuell an affektiv Gesondheet mat Presentatiounen, Atelieren, Webinaren a Workshoppen. Just e puer Themen erausgepickt: et gëtt ënner anerem iwwer Hypersexualisatioun, Contraceptioun, sexuell Rechter an Zäiten vu Covid, Sex-Duerstellungen am Netz a Sexualitéit bei Kanner geschwat.

Invité vun der Redaktioun: Christa Brömmel

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.