Den LSAP-Deputéierte war en Dënschdeg de Moien eisen Invité vun der Redaktioun.

D'Spideeler géingen d'Situatioun nach gestemmt kréien, mä méintelaang géing dat sécher net goen, sou de Rapporter vun de Covid-Gesetzer, de Mars Di Bartolomeo.

D'Regierung huet en Dënschdeg de Point iwwert déi aktuell Situatioun gemaach. Um 12.30 Auer war eng Pressekonferenz vum Premier Xavier Bettel a vun der Gesondheetsministesch Paulette Lenert.

Et leeft dorobber eraus, datt d'Regierung nei Mesuren der Chamber virleet. Falls d'Covid-Zuele stabel, mä héich bleiwen, d'Deputéiert Mesurë kënne validéieren. De Rapporter vun de leschte Covid-Gesetzer, den LSAP-Deputéierte Mars Di Bartolomeo, huet dat en Dënschdeg hei op RTL confirméiert: D'Regierung hätt sech déi lescht Wochen op all Eventualitéite preparéiert an Texter ausgeschafft. De Covid-Bilan den Ament wier séiss-sauer. Déi aktuell Mesurë géifen nämlech wierken, awer net genuch, fir datt ee kéint lassloossen. Dat sot de Rapporter vun de Covid-Gesetzer Mars Di Bartolomeo am RTL-Interview.

„Wann ech d'Echoen aus de Spideeler kréien, dann héieren ech, datt et schwiereg ass, mä datt se et nach stemmen. Méintelaang geet dat mat Sécherheet net". Dowéinst wier et extrem wichteg, nach an d'Zänn ze bäissen, esou de fréiere Gesondheetsminister. Et géing ee „Spektrum" vu Mesurë ginn, deen ee kéint envisagéieren. Den LSAP-Deputéierte wollt awer net spekuléieren, ob elo e Lockdown decidéiert gëtt oder net. Entweder déi aktuell Restriktioune gräifen elo weider an den nächsten Deeg oder et misste weiderer decidéiert ginn, ouni ugeschloe Secteuren nach méi an d'Laberenten ze bréngen. Et wier awer e Seeldanz-Akt, esou de Mars di Bartolomeo.

Entweder d'Zuele géingen an den nächsten Deeg erofgoen oder et misst „nogeschoss" ginn. Wichteg wier, datt de Gesondheetssystem net iwwerlaascht gëtt an d'Chifferen net explodéieren. En État de crise wier nach net néideg, Chamber a Staatsrot wieren den Ament séier genuch.

Am Kampf géint de Virus wier een och net ouni Waffen: Eise Verstand, d'Gestes barrières an déi breet ugeluechten Tester, fir esou d'Infektiounsketten ze briechen, ënnersträicht de Mars Di Bartolomeo, deen och nach sot, hien hätt a 35 Joer aktiv Politik nach ni esou eng grujeleg Kris erlieft. Awer och nach ni sou vill Dialog tëscht Regierung a Chamber.

Invité vun der Redaktioun: Mars Di Bartolomeo

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.