En Donneschdeg de Moie war de Virolog aus dem Luxembourg Institute of Health eisen Invité vun der Redaktioun.

Wou d'Leit sech ustiechen, misst méi analyséiert a kommunizéiert ginn, esou kéint een och déi richteg Mesuren decidéieren.

Dat sot de Virolog Dr Claude Muller en Donneschdeg de Moien. Hie war eisen Invité vun der Redaktioun. Aus epidemiologescher Siicht wier et grondsätzlech ëmmer gutt, fir e Lockdown méiglechst fréi ze maachen. Ob d’Regierung elo déi richteg Mesurë geholl huet, déi richteg Plazen zougemaach huet, dat wier schwéier ze soen, sou de Virolog vum „Luxembourg Institute of Health“. Fir dat ze maachen, misst ee sech op Donnéeë beruffe kënnen, ënnert wat fir engen Ëmstänn déi meescht Infektiounen zustane kommen. Den Dokter Claude Muller plädéiert derfir, datt beim Tracing ganz genee gekuckt gëtt, wéi d’Leit sech doheem oder op der Aarbecht ustiechen. An dann hätt ee wëssenschaftlech Fakten fir ze tranchéieren. Den Ament wieren d’Informatiounen op déi ee sech baséiert net detailléiert genuch, huet de Virolog vum LIH en Donneschdeg de Moie bedauert.

Wann ee besser géif kommunizéieren, géifen d'Leit sech och besser an deene Situatioun schützen.

Elo wär zum Beispill net ganz kloer, firwat d'Horesca méi streng Moossname kritt, wann de Premier am selwechten Otemzuch seet, et géife keng Hotspotten do.

Et kënnt op d'Disziplin vun de Leit un

Dem Dokter Claude Muller no, géif et elo ganz besonnesch op d'Disziplin vun de Leit géif ukommen. Si missten d’Reegelen verstoen an derhannert stoen. An duerfir wier d’Kommunikatioun absolut wichteg.

D’Leit géifen sech dacks anti-zyklesch verhalen. Wann d'Zuelen erop ginn, géifen se besser oppassen. Wa se erof ginn, géifen se sech soen elo kënne mer nees profitéieren bis se nees eropginn.

Wat de Schoultransport ugeet, huet eisen Invité vun der Redaktioun de Moien decaléiert Horairen an d’Spill bruecht fir den Transport „auszedënnen“. Dat wier eng Pist datt net all Schüler a Schülerinnen déi selwecht Zäit missten am Bus sëtzen.

Couvre-feu net wëssenschaftlech evaluéiert

Huet de Couvre-feu reell eppes bruecht, dee jo bis de 15. Dezember verlängert gëtt? Dorobber äntwert den Dokter Muller, duerfir misst een Indikatiounen hunn, datt sech zu dësem spéiden Zäitpunkt besonnesch vill Infektiounen ofspillen. Hie géif awer net wëssen, u wat een dat genee géing festmaachen.

Absolutte "Jo" fir de Corona-Vaccin

Un d'Sécherheet vum Vaccin gleeft den Dokter Muller, wann e bis vun der europäescher Medikamentenagence zougelooss ass.

Datt d’Vaccinen sou séier entwéckelt gi sinn, dat wier u sech kee Problem, esou de Virolog. Dat wat Zäit géif kaschten, wier normalerweis d’Zouloossungsprozedur. Hei hätt ee vill Fräiwëlleger, fir déi grouss Etüde gehat a vill Viruspräsenz an där Populatioun. Duerfir wier et hei méi séier gaangen.

Hie géif sech natierlech impfe loossen, sou eisen Invité Dr Claude Muller de Moien. Prioritär, sou de Virolog, sollten fir d’éischt Risikogruppen, vulnerabel Persounen an d’Gesondheetspersonal geimpft ginn. Wat ëmmer méi Leit derbäi kommen, hätt jiddereen d’Méiglechkeet sech selwer ze schützen. Am Ufank wier eng Häerdenimmunitéit och net sou relevant.

Invité vun der Redaktioun: Dr. Claude Muller

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.