E Mëttwoch de Moie war den Deputéierte vun de Piraten eisen Invité vun der Redaktioun.

Manner Bauchgefill, méi Wëssenschaft a besser analyséieren, wou sech genee ugestach gëtt. Méi Koherenz bei de Corona-Mesuren, fir datt d'Leit se och verstinn an acceptéieren, dat fuerdert den Deputéierte vun de Piraten, de Sven Clement. Hie war e Mëttwoch de Moien eisen Invité vun der Redaktioun.

Déi 2-Persoune-Reegel "2 Leit aus engem Stot däerfe bei een heem kommen" wär net ze kontrolléieren a schwéier z'erklären.

Et wär eng absurd Restriktioun. De Pirat proposéiert entweder e ganze Stot als Besuch zouzeloossen oder Kanner ënner 12 Joer net matzezielen. Et misst ee sécher d'Kontakter reduzéieren, mä et bräicht een eng mënschlech Approche. Et soll een dem Liewen net alles huelen, wat et nach liewenswäert mécht, huet de Sven Clement gemengt.

Den Deputéierte stéiert sech drun, datt d'Regierungspolitik allgemeng net koherent wier: Op där enger Säit eng Laisser-faire-Politik an op der anerer Säit streng Reegelen. Besonnesch blo Ministeren hätten eng liberal Approche, géifen d'Responsabilitéit gären un den Terrain ofginn, zum Beispill den Educatiounsminister, d'Familljeministesch oder de Mëttelstandsminister. Am Horesca-Secteur wär ee par Konter radikal virgaangen, grad esou mat der Ausgangsspär, déi de Piraten no näischt bréngt. Am Horesca-Secteur hätt ee kënne méi präzis analyséieren, wou genee Ustiechunge sinn. Caféen zoumaachen an d'Restauratioun ënner strengen Oploen erlaben, wär fir d'Piraten eng Pist gewiescht.

Ee vun den Haaptproblemer an der Krisegestioun wär, nieft dem Zäitdrock, datt déi 3 Partner sech net eens wären, wat se wëlle maachen a wéi se et wëlle maachen. Dowéinst wär bis ewell d'Chamber och nach net informéiert, wéi et an enger Woch weider geet. D'Koherenz vun de Moossname wär awer wichteg, fir datt se och vun de Leit acceptéiert ginn, sou de Sven Clement e Mëttwoch de Moien.

Invité vun der Redaktioun: Sven Clement

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.