E Méindeg de Moie war den CSV-Europadeputéierte eisen Invité vun der Redaktioun.

London a Bréissel verhandele weider iwwert en Handelsaccord fir nom Brexit. Den Europadeputéierte Christophe Hansen huet de Méindeg de Moien hei op RTL 10% Chance ginn, datt et nach en Duerchbroch gëtt. D’Zäit géing fortlafen, well bis den 31. Dezember muss en Ofkommes stoen. Dobäi géing et dann nach ganz enk ginn, fir d’Demarchen, dorënner déi juristesch, duerchzekréien.

De Christophe Hansen ass och Co-Rapporteur fir den Handelsaccord. Hie sot, et wéisst een, wou d'rout Linne sinn, elo géing et drëm goen, Flexibilitéit ze weisen. Dem Christophe Hansen no hätten d’Britte vill ze verléieren, wann et keen Accord gëtt an d’minimal Standarde vun der Welthandelsorganisatioun gëllen. Hien huet als Beispiller d‘brittesch Automobil- oder Fleeschindustrie genannt.

D’Haaptknackpunkte sinn d’Fëscherei an d’Konkurrenzreegelen. Hei géing nach doriwwer verhandelt ginn, wie kontrolléiert, ob d’Spillreegelen agehale ginn oder net. Um Dësch léich elo d’Propos, datt eng nei Plattform geschaaft gëtt, wou béid Säiten hir Experte schécken, sou de Christophe Hansen. Donieft wéilten d’Britte sech net draschwätze loossen, wéi vill Staatshëllefe si kënnen an hir Ekonomie oder Betriber aspeisen.

Datt d’Britten op deene Punkte blockéieren an eventuell Aboussen a Kaf huelen, wier dem Europadeputéierten no well d’brittesch Regierung wéilt hir Souveränitéit zeréckgewannen. Wat awer "politescht Geplänkels" wier, sou de Christophe Hansen. D’EU géing de Britten ënner Konditiounen Accès op de Bannemaart ginn. Si missten elo an hirem eegenen Interêt pragmatesch sinn.

Invité vun der Redaktioun: Christophe Hansen

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.