E Méindeg de Moie war den CSV-Politiker eisen Invité vun der Redaktioun.

D'CSV géif den Ament eng excellent Aarbecht maachen. Speziell elo a Corona-Zäiten. D'Oppositiounspartei géif ëmmer erëm de Fanger an d'Wonn leeën, mat villen Drénglechkeetsfroen a Motiounen. Dat sot de fréieren CSV-Deputéierten a Minister Marco Schank e Méindeg de Moien am RTL-Interview.

Et wier natierlech schwéier an der Oppositioun, well et wier ee manner visibel. Dowéinst géif ee wuel net sou gutt bei Ëmfroen ofschneiden. Et dierft een awer net labber loossen. De Marco Schank hat sech am Oktober no 20 Joer aus der nationaler Politik zeréckgezunn, fir méi Jonken aus der CSV Plaz ze maachen. Hien hätt säin Deel zur Erneierung an der Partei bäigedroen.

De Gemengepapp vun Esch-Sauer hätt ëmmer probéiert, seng gréng Iwwerzeegungen national a kommunal mat anzebréngen. Buergermeeschter sinn, géif him iwwregens am meeschte Spaass maachen, well een do ganz no bei de Leit wier.

De Marco Schank ass nach Buergermeeschter vun Esch-Sauer, der Gemeng um Stau. De Reservatiounssystem, deen een am Summer wéinst Corona agefouert hätt, wéilt ee bäibehalen. E misst zwar nach verbessert ginn. Ënnert anerem soll en eppes kaschten – de Marco Schank denkt un 2-3 Euro, ouni sech wëlle festzeleeën, well eenzel Leit massiv reservéiert hu fir e puer Weekender. Dat soll net méi méiglech sinn.

Mat de Sue soll och eng Navette ronderëm d'Plagen agefouert ginn. Sou kann een zum Beispill nach besser vum neien Opfangparking mat 700 Plaze profitéieren. Och zu Lëlz ass sou ee Parking geplangt. De Parking bei de Plagë soll weider kaschten. De Präis wäert liicht eropgoen. Op den Opfangparkinge soll ee gratis kënne stoen.

D'Gemeng wollt och en neien Hotel zu Lëlz bauen, an enger “zône hotelière”. Lo huet awer de Staat deen Terrain kaf, mam Argument, d'Regierung wéilt sécher stellen, datt déi zukünfteg Notzung am Aklang mam Waasserschutz wier. Et wär een zesummen am Naturpark... de Marco Schank ass dowéinst enttäuscht, datt net méi Vertrauen an d'Gemeng do wär an ee mol net informéiert gouf.

Invité vun der Redaktioun: Marco Schank

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.