En Dënschdeg de Moie war de Vizepremier eisen Invité vun der Redaktioun.

Et geet drëms am Ëmgang mam Virus en Equiliber ze fannen. Dat wier net einfach. Engersäits vill Leed evitéieren an d'Leit am Gesondheetssecteur z'entlaaschten, anerersäits net ze staark an d'Fräiheeten anzegräifen. Dat sot de Vizepremier François Bausch en Dënschdeg de Moien, hie war eisen Invité vun der Redaktioun.

Et dierft ee sech net eleng vum Virus leede loossen, mä op alles kucken. Et dierft een net vergiessen, datt eis Fräiheeten enorm ageschränkt ginn. Un d'Oppositioun war et den Appell d'Politik an dëser Kris erauszeloossen, och wann et normal wier, datt d'Oppositioun d'Regierung kontrolléiert. Hei géif et ëm d'Gesondheet vun de Leit goen.

Och am ëffentlechen Transport hätt ee misse Kompromësser fannen, sou den zoustännege Minister Bausch. Datt zu Spëtzenzäiten, notamment Zich mat Frontalieren, iwwerfëllt sinn, géif dorunner leien, datt een net genuch Capacitéiten hätt. De Mobilitéitsminister Bausch wier oppe fir Léisungsproposen an deem Kontext. Mä och am Ausland hätt ee fir den ëffentlechen Transport nach net vill gutt Iddie fonnt.

Lëtzebuerg huet dann de Fluchverkéier tëscht Lëtzebuerg a Groussbritannien wéinst enger Virusmutatioun bis den 3. Januar gestoppt. Hei wär et fir hie kloer gewiescht, datt een an dëser Situatioun séier misst reagéieren. Et kéint een net eng Woch waarden, bis d'Unioun da villäicht eng Decisioun hëlt. De François Bausch bedauert, datt et keng gemeinsam europäesch Positioun gëtt. D'EU huet zimmlech versot an der Pandemie, sot de François Bausch, fir eenheetlech Reegelen ze schafen.

Lëtzebuerger Residente wären elo blockéiert. Theoretesch kéint ee Leit rapatriéieren. Mä et misst een dat genee kucken. Et dierft net dervu profitéiert ginn, fir iwwer Lëtzebuerg zeréck an Europa ze kommen. Et misst een och kucken – mam Gesondheetsministère - ënnert wéi enge Konditiounen déi Retoure wären, eng Quarantän zum Beispill. Bis e Mëttwoch soll een do eng Äntwert hunn.

De Minister Bausch huet och nach emol betount, datt gemeinsam Léisunge besser si wéi zoue Grenzen. Geschwë wäert een um Fluchhafen, fir all d'Retouren och nieft de PCR-Tester Schnelltester offréieren. Dat sou séier wéi méiglech. Sou hofft een, datt méi Leit sech teste loossen. Den Ament wieren et ronn 15%.

De François Bausch huet un d'Leit appelléiert, sech testen ze loossen, wann een aus dem Ausland zeréck kënnt.

Invité vun der Redaktioun: François Bausch

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.