E Méindeg de Moie war den Haut-commissaire à la protection nationale eisen Invité vun der Redaktioun.

Um 12.15 Auer gëtt déi éischt Persoun hei am Land geimpft… 430 Leit aus dem Spidols-, Fleeg- a Betreiungssekteur sinn iwwert 3 Deeg all Dag agelueden, fir an der Victor Hugo Hal um Lampertsbierg geimpft ze ginn. Si mussen 21 Deeg méi spéit eng zweet Dos vum Vaccin kréien. Déi éischt 9.700 Dosen vum Pfizer-BionTech Vaccin sinn e Samschdeg am Land ukomm. Dat geet jo duer fir ronn 4.800 Leit ze impfen. Vum 11. Januar u soll déi nächst Liwwerung ukommen an dann all Woch eng Rei Liwwerungen, fir bis Enn Januar ronn 12.000 Leit kënnen duerchzeimpfen.

De Luc Feller iwwer Liwwerunge vu Biontech/Pfizer

D’Impfcampagne leeft lues un, et geet net vun 0 op 100 dat ass kloer, sou den Haut-commissaire à la protection nationale de Luc Feller e Méindeg de Moien hei op der Antenn. Datt eréischt zwee 2 Deeg no der Liwwerung geimpft gëtt, géing mat de logistesche Contrainten zesummenhänken. Pfizer kéint net direkt an d’Spideeler liwweren, ma just op eng zentral Plaz an et hätt een net genee gewosst wéini genee de Vaccin géing geliwwert ginn.

Datt d’europäesch Unioun e Retard vun 3 Wochen op Groussbritannien huet, dat wier op d’Regulatioun zeréckzeféieren. D’europäesch Agence fir Medikamenter, d’EMA, hätt detailléiert Donnéee gefrot, fir hir Etüden iwwert den Impfstoff kënnen ze maachen. Vläicht méi detailléierter, wéi an anere Länner, wat awer och wichteg wier, fir Vertrauen an de Vaccin ze schafen.

Et wier nun mol eng weltwäit Campagne, déi hei géing lafen. Wat awer méi Autorisatioune vun Impfstoffer vun der EMA ausgeschwat ginn, wat et och méi séier géif goen, dass jiddereen un den Tour ka kommen.

Stand haut, krut de Grand-Duché iwwerdeems bis Enn Mäerz, vum europäeschen Regulatiouns-Mechanismus, Impfstoffer zougesot, fir eng 36.000 Leit kënnen ze vaccinéieren. Momentan ass Vaccin bestallt fir 1 Millioun Leit kënnen ze impfen.

Invité vun der Redaktioun: Luc Feller

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.