En Dënschdeg war d'Fra un der Spëtzt vun der JHL eis Invitée vun der Redaktioun.

„Den 2ten Lockdown huet eis Betriber nach méi haart getraff wéi den Éischten. Net nëmme well mer eng helle Wull vu Mesuren en place gesat hunn, mä och well mer wëssen, dass mir keng Infektiounsquell sinn. Do entsteet natierlech eng gewësse Frustratioun bei de Patronen.“

Dat sot d’Alexa Ballmann, d'Presidentin vum Jonken Handwierk, als eis Invitée vun der Redaktioun um Dënschdeg de Moien.

Bei de Betriber wier och eng gewëss Frustratioun do, well se eng helle Wull vu Sécherheetsmesuren op d’Been gesat hunn an elo awer hu missen zoumaachen. Dat iwwerdeems een, dem Alex Ballmann no, wéisst datt déi Betriber déi elo zou sinn, keng Infektiounsquell sinn. Si géing gewësse Mesure verstoen, mä et géing ee wëssen, datt d’Infektiounsgefor op anere Plaze méi grouss wier.

D’Alexa Ballmann huet en Appell gemaach u jiddereen, dee weiderhi mengt, sech net mussen un d’Mesuren ze halen: Et stéingen Existenzen um Spill. Dofir wier et net den Ament fir Party ze maachen!

Wat déi staatlech Hëllefe fir d’Betriber ugeet, wieren eenzeler ze begréissen. Allerdéngs, wier d’Hëllef eng Hëllef fir d’Relance an elo wou eng Rei Betriber ganz zou sinn, wier d’Situatioun eng ganz aner an déi Hëllef géing net méi duergoen.

D’Alexa Ballmann huet sech iwwregens gewënscht, datt d’Hëllef méi gestaffelt wier. D’Entrepreneuse sot, d’Betriber wiere permanent am Gaang ze jongléieren a sech duerch Gesetzestexter ze liesen. Dacks wieren d’Konditiounen einfach ze komplizéiert an den administrativen Opwand ze grouss. D’Alexa Ballmann huet awer begréisst, datt de liberale Mëttelstandsminister Lex Delles sech dacks Zäit géing huelen, fir sech d’Doleancen unzelauschteren.

Invité vun der Redaktioun: Alexa Ballmann

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.