E Mëttwoch de Moie war de CEO vun der Air Rescue eisen Invité vun der Redaktioun.

„Normalerweis gesi mir e Patient eemol bei eis, nämlech dann, wa mer se an d’Spidol fléien. Hei war et esou, dass mer se no e puer Wochen och nees, geheelt, konnten heem fléien, dat war schonn eng emouvant Geschicht...“

Dat sot de René Closter, de President vun der Air Rescue um Mëttwoch de Moien, als eisen Invité vun der Redaktioun.

D’LAR huet jo virun allem am Fréijoer gehollef, eng ganze Partie Corona-Patienten aus dem Ausland op Lëtzebuerg bruecht, fir dass se hei a Klinicke gehollef kréien.

Fir hiren Asaz krut d‘Air Rescue och den Adenauer-De Gaulle Präis.

Et wier en ustrengend Joer gewiescht, sot de René Closter. Vill fléie géif nämlech och ganz vill Maintenance bedeiten.

Et wéilt een dann och zäitno e méi grousse Fliger kafen, een deen déi duebel Distanz vun de Momentane ka fléien, a virun allem eben op Laangdistanzen an den Asaz kommen. A verschiddene Regiounen an der Welt hätt ee mat de méi klenge Fligeren nämlech ëmmer méi Problemer, fir eng Autorisatioun ze kréien, fir eng Tëschelandung kënnen ze maachen. Mat engem méi grousse Fliger, kéint een dat ëmgoen.

An en Hangar vun der Air Rescue soll iwwerdeems och en Impf-Zenter hikommen. Den Equipement soll Ufank d’nächst Joer opgeriicht ginn, an da wier een ofhängeg vun der Livraisoun vum Vaccin.

Invité vun der Redaktioun: René Closter

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.