En Donneschdeg de Moie war den Direkter vun der Fondation du Grand-Duc et de la Grande-Duchesse eisen Invité vun der Redaktioun.

D'Fondation du Grand-Duc et de la Grande-Duchesse huet nach ni sou vill Spende kritt wéi dëst Joer, dat sot en Donneschdeg de Moien den Direkter vun der Fondatioun vum Grand-Duc an der Grande-Duchesse. De Philippe Majerus war eisen Invité vun der Redaktioun.

Schueden Nouvellen wéi den Openthalt vun der groussherzoglecher Koppel am Lockdown iwwert d'Feierdeeg zu Biarritz der Fondatioun? De Philippe Majerus mengt net, datt dat en negativen Impakt hätt. D'Aktivitéite vun der Grande-Duchesse an der Fondatioun géife fir sech schwätzen. D'Leit wieren dankbar fir d'Hëllef, déi se géife kréien. Fir de Rescht huet den Direkter vun der Fondation du Grand-Duc et de la Grande-Duchesse op de Communiqué vum Haff an d'Erklärunge vum Premier verwisen.

D'Fondatioun, déi exklusiv iwwer Done finanzéiert gëtt, ass am soziale Beräich aktiv. Och an der Pandemie. Et wier een eppes wéi den "Office social fir déi hoffnungslos Fäll", sou de Philippe Majerus.

D'Coronakris géf all déi Krise verstäerken, déi mer souwisou schonn erliewen. An der Pandemie wiere ganz vill Leit total isoléiert gewiescht. Deenen hätt ee wëllen hëllefen. Sou hätt d'Grande-Duchesse zesummen mat der Fondatioun Cancer Telefonsgespréicher gefouert. Et hätt ee Studentinnen ënnert d'Äerm gegraff déi hir Aarbecht duerch Corona verluer hunn a riskéiert hätten hir Uni missen ofzebriechen. Et gouf ee gemeinsame Projet mat engem Seniorclub an d'Fondatioun hätt Femmes en détresse Smartphonen zur Verfügung gestallt, fir Consultatiounen ze maachen.

Am Ausland ass d'Fondation du Grand-Duc et de la Grande-Duchesse ënnert anerem am Burundi aktiv, an zanter dësem Joer am Afghanistan, wou Néiesche Maske gebitzt hunn a Meedercher zousätzlech Coursen offréiert kruten, fir sech op d'Uni virzebereeden.

Invité vun der Redaktioun: Philippe Majerus

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.