E Mëttwoch de Moie war d'CSV-Fraktiounscheffin eis Invitée vun der Redaktioun.

"Onvirsiichteg ass dat mannst wat ee ka soen", esou kommentéiert d'CSV-Fraktiounscheffin Martine Hansen d'Changementer bei de Covid-Mesuren, déi d'Regierung en Dënschdeg annoncéiert huet. D'CSV géing d'Decisioune vun der Dräier-Koalitioun op alle Fall net verstoen. D'Zuele wieren zwar erofgaangen, ma et wier awer och manner getest ginn, den Effet vun de Feierdeeg stéing nach aus, et géif eng nei Virusvariant ginn an d'Experte géingen net manner- mä méi Restriktioune fuerderen.

Martine Hansen am Interview / Resumé Pit Everling

D'CSV wier op alle Fall méi streng gewiescht an dat och schonn éischter am Hierscht. D'Schoulen hätt een lo mol nach eng Woch zougelooss. D'Solden déi ustinn, maachen der CSV-Fraktiounscheffin op alle Fall Suergen.

Op där aner Säit krit den Horesca-Beräich alt nees de schwaarze Péiter zougeschoustert. Leider wieren ni wierklech Analyse gemaach ginn, wéi eng Roll d'Restauranten a Caféen bei den Infektioune spillen. Den Horesca hätt och alt nees keng Perspektive kritt, wéi et nom 31. Januar wäert virugoen, esou d'Nord-Deputéiert.

D'CSV-Fraktioun stéing dem Text op alle Fall kritesch géintiwwer a wéisst nach net, wéi se géing géing ofstëmmen.

D'EU hätt sech da bei de Commandë vun de Vaccinen net gutt ugeluecht. Op nationalem Niveau hätt ee misste parallel mat de Produzente verhandelen an d'CSV hätt d'Dräier-Koalitioun och reegelméisseg dorop opmierksam gemaach.
Bei der Ëmsetzung vun der nationaler Impfstrategie gëtt eng feuille de route vermësst.

D'CSV wéilt 2021 méi mat enger Sprooch no bausse schwätzen a wéilt weider konstruktiv sinn, esou d'Martine Hansen.
Ob a wéi de Kongress dëst Joer wäert ausgesinn, dat wäert an den nächste Wochen decidéiert ginn.
Ob si eng eventuell weider Kandidatur vum President Fränk Engel géing ënnerstëtzen, dat kéint si elo nach net soen, sou d'Martine Hansen. Et wéisst ee jo nach net wien alles do géing kandidéieren.

Invité vun der Redaktioun Martine Hansen

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.