En Dënschdeg de Moien war den Direkter vum Konsumenteschutz eisen Invité vun der Redaktioun.

Invité Guy Goedert / Resumé Annick Goerens

De Konsumenteschutz hat net méi Aarbecht zejoert duerch Reesen, déi wéinst der Corona-Pandemie stornéiert goufen, esou den Guy Goedert, Direkter vun der ULC am RTL-Interview. D'Rechts-Situatioun wier do nämlech ganz kloer. De Konsument huet e Recht drop rembourséiert ze ginn. Dat verbitt awer net, dass de Prestataire kann offréieren, e Bong ze ginn, valabel fir ee Joer. De Konsument muss den awer net acceptéieren an do wären ugangs effektiv Diskussioune gewiescht, déi duerno awer séier gekläert goufen. D'Remboursementer géife mëttlerweil gutt klappen, och wa se bësschen Zäit bräichten.

Schwéierpunkt vun den Sträitfäll weiderhin am Bau/Logement


5.313 nei Dossiere goufen zejoert bei der ULC opgemaach. Dat ass e Plus vun 2,3 Prozent am Verglach mat 2019. Schwéierpunkte bleiwe Problemer beim Bau, all Zorte vun artisanalen Aarbechten, awer och do hannendrun méi spezifesch Logementsproblemer mat Loyers-Bailen, Co-Proprietéiten an Immobilienagencen. Déi zweet Hallschent wären dann administrativ Problemer, Alimentatioun, Assurancë bis zu Forfait-Reesen.
 
Am Fréijoer waren eng ganz Rei Leit, déi sech beschwéiert haten, well d'Fraise fir hir Constructioun däitlech an d'Luucht gaange sinn, wéinst de Covid-Mesuren, déi fir d'Aarbechter mussen ëmgesat ginn. Do géinge sech nach eng Réi juristesch Froe stellen, erkläert den Direkter vum Konsumenteschutz. Do wär ee sech awer och mat der Federatioun aus dem Bauwiesen eens ginn, dass d'Kontrakter zu dem Präis z'acceptéiere sinn, wéi se am Ufank nach virun der Pandemie geholl gi waren. Par contre geet den Direkter vun der ULC awer dovun aus, dass Kontrakter, déi zanter leschtem Joer gemaach goufen, wuel déi supplementär Käschten, déi duerch d'Corona-Restriktiounen entstinn, mat am Präis enthalen.

Sammelkloen musse public gemaach ginn

Wat Sammelkloe vu Konsumenten ugeet, do läit de Gesetzprojet den Ament bei der zoustänneger Chamberkommissioun. D'ULC fuerdert awer, datt esou eng Sammelklo ëmmer muss public gemaach ginn, wa se da recevabel ass, eben, fir datt sech weider concernéiert Clienten der Klo kënnen uschléissen.

Den Ament wier dat net esou am Gesetz virgesinn. Ma och déi europäesch Direktiv géing dat virgesinn, erkläert de Guy Goedert. Dofir hätt d'ULC och elo an engem Bréif, d'Ministesch fir den Konsumenteschutz Paulette Lenert opgefuerdert, fir de Gesetzprojet z'amendéieren an esou der Fuerderung nozekommen.
 
Wat seet d'ULC zu de sëllege Changementer vun de Corona-Mesuren?

Den Direkter vum Konsumenteschutz wéilt kengem e Reproche maachen. Natierlech wier et net glécklech gewiescht, wéi zu engem gewëssen Zäitpunkt, d'Klassen alternativ an d'Schoul gaange sinn an anerersäits d'Bussen an d'Zich awer komplett voll waren. Ma do misst ee sech awer d'Fro stellen, wat wier d'Alternativ zu de Mesuren?

Invité vun der Redaktioun Guy Goedert

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.