D'Presidentin vun der Salariatskammer an dem OGBL war e Mëttwoch de Moien eis Invitée vun der Redaktioun.

Et bräicht een e laangfristege Krisemanagement an net ëmmer nees kuerzfristeg Mesuren, déi d'Fräiheete vun der Gesellschaft immens aschränken. Dat sot d'Presidentin vum OGBL a vun der Salariatskammer um Mëttwoch de Moien. D'Nora Back war ons Invitée vun der Redaktioun.

No 10 Méint nach ëmmer kee Plan sanitaire

D'CSL kritiséiert, dass och no 10 Méint Pandemie nach ëmmer kee Plan sanitaire géing virleien, an dass och guer net mat de Sozialpartner géing geschwat ginn. De Sozialdialog géing leider net gutt genuch fonctionéieren. Ëmmer nees hätt een en Appell un d'Regierung gemaach, fir eng Tripartite z'organiséieren. Geschitt wär bis ewell näischt, kritiséiert d'Presidentin vum OGBL. D'Mesuren an d'Impfcampagne missten och méi transparent, mat kloren Donnéeën erkläert an an engem breeden Debat diskutéiert ginn. Dat wier wichteg fir d'Akzeptanz an der Populatioun.

Covid-Gesetz fir Sécherheet op der Aarbecht

D'Situatioun am Horesca-Secteur mécht der Presidentin vum onofhängege Gewerkschaftsbond och enorm Suergen, dofir géing een och all Form vun Hëllefen un de Secteur ënnerstëtzen. Dernieft fuerdert d'Presidentin vun der Chambre des salariés awer och e spezifescht Covid-Gesetz fir d'Sécherheet op der Aarbecht. Am private géif ee staark ageschränkt an och kontrolléiert a sanktionéiert ginn. Op der Aarbecht wier dat net de Fall. Do kéint an Zukunft awer och eng ITM an d'Spill kommen, proposéiert d'Presidentin vun der CSL.

De Plan hospitalier muss reforméiert ginn

D'Kris hätt de Personalmanktem am Santés-Secteur gewisen.
Dofir fuerdert, d'Nora Back en neie Plan hospitalier. Fir méi Ressourcen um Niveau vum Personal, awer och vum Material. Positiv wier awer, datt dat Ganzt elo zur Chefsaach vum Premier erkläert gi wier.

Aus der sanitärer Kris wäert och eng ekonomesch ginn. Dowéinst missten elo Aarbechtsplazen ofgeséchert an d'finanziell Abousse limitéiert ginn. Et dierft een d'Menagen op kee Fall méi belaaschten. Am Géigendeel, d'Kafkraaft vun de Leit misst gestäerkt ginn, notamment an deem d'Kannergeld erhéicht gëtt. Dat wier zanter 2006 desindexéiert a géif stänneg u Wäert verléieren. Et hätt ee vun de Regierung versprach kritt, dass eppes passéiert, ma dat géif net séier genuch, an net héich genuch passéieren.

Invité vun der Redaktioun: Nora Back

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.