E Mëttwoch de Moie war de President vun der ALK, der Association luxembourgeoise des kinésithérapeutes, eisen Invité vun der Redaktioun.

D'Frustratioun bei de Kinéë wiisst, dat sot de Mëttwoch de Moien de President vun der Lëtzebuerger Kinésassociatioun bei eis am Interview. De Patrick Obertin, deen zanter 1998 als fräischaffende Kiné schafft, war eisen Invité vun der Redaktioun. D'Kinéen an d'CNS sinn den Ament an der Mediatioun, nodeems d'Gesondheetskeess Enn dës Joers hir Tariffer net wollt erhéijen. D'Kinéen hätte gär eng Augmentatioun vun 2,82% gehat, wéi aner Gesondheetsberuffer och. D'CNS awer hätt virun allem op déi héich Depensen aus den zwee Joer virdru verwisen, déi ze séier an d'Luucht gaange wieren an dowéinst de méi héijen Tarif refuséiert. De President vun der Lëtzebuerger Kinésassociatioun Patrick Obertin ass awer net mat dëser Rechnung averstanen.

Wéi eng Kinéen hätte mer gär hei zu Lëtzebuerg?

D'Kinéë sinn dem Patrick Obertin no deen eenzege Gesondheetsberuff, dee keng Tarifaugmentatioun zougestane krut. Dat wier absolut inakzeptabel. Virun allem, well scho méi laang bei Kinéë gespuert géif. Dat hei wier net déi éischt Nullronn an d'Hausse fir ëmmer verluer. Et kéint een awer net eng héich Qualitéit a Sécherheet fir de Patient erwaarden, wann een ëmmer manner zur Verfügung hätt. Grad elo an dësen Zäite misst ee sech d'Fro stellen, wéi eng Kinéë wëlle mer hei am Land. Eng industriell Masseproduktioun oder qualitativ héichwäerteg a sécher Kinéen? Sou de Patrick Obertin. Wann ee sech elo net bewosst gëtt, wéi wichteg e gudde Gesondheetssystem ass an datt hei all Acteur muss gutt funktionéieren, da géif hien net wëssen wéini mer dat verstoe géifen.

Et wier och net sou, datt all Kiné déi lescht Jore méi Sue verdéngt hätt, et wieren der éischter vill bäikomm, huet de President vun der ALK de Mëttwoch de Moie betount. Ongeféiert 20% an de leschten zwee Joer. Sou vill ongeféiert wéi d'Ausgaben geklomme sinn.

Lëtzebuerg huet eng vun den héchste Konzentratiounen u Kinéen

Ma déi géifen awer och gebraucht, géifen hir Patiente fannen, sou de Patrick Obertin. D'Demande vun de Leit wier nämlech an d'Luucht gaangen. Wann d'Politik decidéiert, datt Patienten éischter aus der Klinik entlooss ginn. Stéchwuert virage ambulatoire, da wier et normal, datt dës Leit an externe Praxissen da behandelt ginn. De President vun der Lëtzebuerger Kinésassociatioun ass formell. Eleng mat de Lëtzebuerger Kinéë wier d'Aarbecht net ze maachen.

Diplomer musse méi kontrolléiert ginn

Ee Problem sinn dogéint déi ënnerschiddlech Diplomer. Hei am Land gëllt de Master zanter 2018 als Ausbildungsniveau fir e Kiné. Aus dem Ausland kommen der awer och mat Bachelor, also mat manner Qualifikatioun, sou de President vun der Lëtzebuerger Kinésassociatioun. Hei missten d'Autoritéite bei der Homologatioun méi genee kucken a besser kontrolléieren. Hei leeft net alles riicht, huet de Patrick Obertin ënnerstrach an huet d'Beispill vun engem Kiné genannt, deen eng Akkreditatioun krut, obwuel em déi gesetzlech net zougestanen hätt.

Covid-Restriktioune bréngen Onkäschten

D'Hygiènesmesuren, déi sanitär Covid-Konzepter, hätten d'Kinéen zejoert Sue kascht, sou nach eisen Invité. Lëften, desinfizéieren, etc. Hie kéint elo och manner Patienten an enger Stonn gesinn. Datt d'Leit nom Lockdown zejoert an engem méi schlechte kierperlechen Zoustand bei si komm wieren, confirméiert och de Kiné. Elo 6 Méint duerno wier hie grad réischt bei verschiddene chronesche Patienten nees um Niveau, wou ee virum Confinement war, well nees mat deene Leit geschafft ka ginn.

D’CNS wollt iwwregens op eis Nofro hin näischt zu dësem Ament zu den Tarifverhandlungen mat de Kinéë soen.

Invité vun der Redaktioun: Patrick Obertin

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.