E Freideg de Moie war déi gréng Europadeputéiert eis Invitée vun der Redaktioun.

"Ech bleiwen derbäi, datt déi europäesch Impfstrategie richteg war. Et war gutt, datt d’EU zesumme verhandelt a bei 6 verschiddene Pharmakonzerner bestallt huet", sot déi gréng Europadeputéiert Tilly Metz e Freideg de Moien. Si war eis Invitée vun der Redaktioun um RTL-Themendag iwwer d’Impfen. Mä mir brauche méi Transparenz, méi Informatiounen iwwert d'Kontrakter tëscht der EU-Kommissioun an de Pharmakonzerner.

Et hätt ee jo net gewosst, wien als éischte kéint liwweren. Et wier wéi bei enger Päerdscourse, wou kee weess, wie gewënnt.

Et wär jiddefalls genuch a souguer ze vill bestallt ginn: 2,3 Milliarden Impfungen.

De Mythe, et wäert net genuch do si fir Europa, ass schlicht falsch

D’Tilly Metz fäert net, datt d’EU net genuch kritt. Déi gréng Europadeputéiert fäert dat éischter fir aner Länner, fir déi méi aarm Länner. Et wär kee sécher, bis mer net all sécher sinn, sou d'Politikerin, mee de Mythe, datt genuch Impfdosisse fir Europa do wieren, wier schlicht falsch. "Ech maache mir keng Suerge fir Europa. Déi Dosisse wäerte kommen", do war d'Tilly Metz formell.

Datt de Vaccin bis elo nëmme lues geliwwert gëtt, hätt och mat Logistik an der Kommunikatioun a Punkto Impfcampagne an de Memberstaaten ze dinn. Donieft hätt Pfizer/Biontech och elo hir Liwwerungen un d'Länner ugepasst, nodeems bekannt gouf, datt ee 6 amplaz vu 5 Dosissen aus engem Flacon zéie kann. Dat wier nu mol e Betrib, deen no de Käschte kucke géif.

Transparenz schaaft Vertrauen an de Vaccin

D’Tilly Metz krut Abléck an ee vun de 6 Kontrakter mat de Pharmakonzerner. An de Kontrakt mat der Firma Curevac. Allerdéngs wären essentiell Passagë geschwäerzt gewiescht. E Mëttwoch huet d'Politikerin am Europaparlament gefuerdert, alleguerten déi 6 Kontrakter mat de Pharmakonzerner missten ëffentlech gemaach ginn. Déi Fuerderung huet si och de Freideg de Moie bei eis op der Antenn widderholl. D'Biergerinnen a Bierger hätten e Recht ze wëssen, wat drasteet. Ëmmerhi géif et ëm vill ëffentlech Gelder, Milliarde goen, déi an d'Entwécklung vum Vaccin gestach goufen.

Si fuerdert, datt all d’Kontrakter ëffentlech gemaach ginn, ouni datt Passagë geschwäerzt ginn. Fir ënnert anerem ze wëssen, wie responsabel ass, wa Problemer géifen optauchen. Bis ewell awer konnten d'Politiker awer Informatiounen iwwert d'Delaien, d'Präisser an d'Kompositioun vum Vaccin net agesinn.

Wann d'Kommissioun Transparenz verweigert, "schéisse mer eis selwer an d'Been", mengt d'Tilly Metz. Well fir Vertraue bräicht een d'Transparenz. Duerfir missten och all d'Resultater vun de klineschen Analysen op den Dësch geluecht ginn.

Leschten Informatiounen no kéint op d'mannst de Kontrakt mat Biontech/Pfizer ëffentlech gemaach ginn.

Europäeschen Impfpass dierf net zu Diskriminatioune féieren

Den digitalen EU-Sommet en Donneschdeg hätt all Zäit gewisen, datt d'Situatioun weider eescht ass. Déi kruzial Fro vun engem europäeschen Impfpass, deen déi lescht Deeg vill diskutéiert gouf an um Sommet mol nach op Äis geluecht gouf, ass an den Ae vum Tilly Metz, wat domadder gemaach gëtt. Virun allem mat den Donnéeën a wéi se stockéiert ginn. Virun allem hätten déi Gréng am Europaparlament e seriöe Problem domadder, wa Leit duerch sou ee Pass géifen diskriminéiert ginn, d'Arees a Länner refuséiert kréien oder vu verschiddene kulturellen Aktivitéiten ausgeschloss ginn, wa se keen Impfpass virweise kënnen. Virun allem zu engem Ament, wou nach net jiddereen Accès zum Vaccin huet an net jiddereen och geimpft ka ginn.

D‘Affär Monica Semedo wollt déi gréng Europadeputéiert de Freideg de Moien net weider kommentéieren. Wann et engem schonn net gutt geet, sollt een net nach op ee klappen.

Invité vun der Redaktioun: Tilly Metz

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu, op der App an am RTL Play ass d'Emissioun dono och am Replay ze fannen.