E Méindeg de Moie war de President vun der Horesca-Federatioun eisen Invité vun der Redaktioun.

Eng Katastroph! Dramatesch! Sou huet den Horesca-President Alain Rix déi aktuell Situatioun beschriwwen. Dëst, well d'Restauranten a d'Caféë zesummegerechent geschwë 6 Méint zou wieren. D'Reserve vun deene meeschte Leit am Secteur wieren opgebraucht, déi aktuell Hëllefe géife net duergoen a si kéimen och net séier genuch. Donieft géif et u Planungssécherheet feelen. D'Leit am Secteur wëssen einfach net, wou et hi geet a wéini een nees dierf opmaachen.

Wuel géif ee verstoen, datt d'Gesondheet natierlech virgeet, an awer wier d'Situatioun ganz schwiereg. "Gidd eis dach endlech eng Perspektiv" huet de President Alain Rix am Numm vum Horesca-Secteur vun der Dräier-Koalitioun gefuerdert. Et géif ee verstoen, datt d'Regierung net wéisst, wou d'Pandemie higeet, sou den Alain Rix weider. Hie freet sech awer, ob Lëtzebuerg säin Horesca-Secteur muss zouhalen, well d'Nopeschlänner menacéiert hunn, hir Grenzen soss zouzemaachen, fir z'evitéieren, datt ze vill Leit géifen eriwwerkommen.

D'Relatioun mam Mëttelstandsminister Lex Delles wier awer gutt. Ma et wier net hien, deen d'Kees huet, mä dat wier de Finanzminister Pierre Gramegna. Et géif villes versprach ginn, an da kéim näischt. Et gouf zum Beispill e Gesetz iwwert d'Hëllefe fir Independante versprach, ma do wéist een net, wou dat aktuell drun ass.

Wéi vill Betriber wéinst der Pandemie missen zoumaachen, géife sech réischt méi spéit weisen. Fir hei d'Zuel awer esou niddreg wéi nach iergendwéi méiglech ze halen, ass den Horesca-President Rix säi Message un d'Regierung kloer: 
Séier handelen, eng Perspektiv ginn a keng weider Käschte provozéieren.

Invité vun der Redaktioun: Alain Rix

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu, op der App an am RTL Play ass d'Emissioun dono och am Replay ze fannen.