En Dënschdeg de Moie war den Apdikter, Deputéierten a Member vun der Santéskommissioun eisen Invité vun der Redaktioun.

Retizenze bei de Vaccine kann de gréngen Deputéierte Marc Hansen net novollzéien. Bis ewell wiere keng bedenklech Niewewierkunge bekannt, sou de Parlamentarier an Apdikter en Dënschdeg de Moien am RTL-Interview. De Problem wier, datt bei dësem Thema Angscht verbreet gi wier, zum Beispill am Internet.

Op alle Fall schéngt et an den Ae vum Marc Hansen mat der Campagne net duer ze goen, do misst Lëtzebuerg lo méi maachen, ënner anerem kéinten d'Gesondheetsberuffer d'Roll vun engem Mediateur anhuelen. Datt am Santés- a Fleegesecteur d'Impfbereetschaft net méi grouss soll sinn, doriwwer wier hien iwwerrascht gewiescht. Ma déi Zuele misst een awer relativéieren, well de Wëlle schéngt awer do ze sinn. Do kéint et nach Problemer mam Courrier, mat Informatiounen oder och technesch Schwieregkeete ginn.

Mir stéingen allgemeng am Ufank vun den Impfungen. Et wiere puer "Couacen" dran, ma déi Problemer wäerte sech léisen, sou de Marc Hansen.

Datt Apdikter Impfunge maache sollen, sou wéi dat am Frankräich ugeduecht ass, dat wier den Ament zu Lëtzebuerg keen Thema.  Schnelltester kéinten an Zukunft awer nach méi an den Asaz kommen, mengt de gréngen Deputéierte weider.

Bei Antikierper-Medikamenter sollt de Grand-Duché sech un déi europäesch Agence Ema halen.

An den Apdikte gëtt an dëser Pandemie festgestallt, datt déi mental Gesondheet vun enger Rei Leit impaktéiert ass. Et géife méi Froe gestallt ginn. Zuelen hätt hien net, ma d'Tendenz wier awer do, datt méi Stress-Medikamenter konsuméiert ginn.

Déi gutt Nouvelle wier déi, datt Erkältungen a Grippe manner zirkuléiere wéi soss. D'Gestes barrières hätten hei hiren Deel dozou bäigedroen.

Invité vun der Redaktioun: Marc Hansen

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu, op der App an am RTL Play ass d'Emissioun dono och am Replay ze fannen.