E Freideg de Moie war de President vum chrëschtleche Gewerkschaftsbond den Invité vun der Redaktioun.

An der aktueller Kris wier et wichteg, datt et en Echange gëtt. Ma de grousse Problem wier deen, datt keng Tripartite virgesinn ass. Dat sot de Patrick Dury, President vun der Gewerkschaft LCGB, de Freideg de Moien am RTL-Interview.

Eng vun den Haaptfuerderunge vum chrëschtleche Gewerkschaftsbond ass déi vun engem alternative Chômage-Modell mat sektorielle Reclassements-Cellulen. A wann dat net duergeet, da kann och vun travaux d'utilité publique geschwat ginn, sou de Patrick Dury.

De Gewerkschaftler rechent domadder, datt no der Kris de Chômage an déi sozial Problemer wäerten an d'Luucht goen. Dofir wier et néideg, eng Tripartite ze organiséieren. Leider géing d'Regierung am Moment net dorop agoen.

Hie géif op alle Fall bedaueren, datt et aktuell éischter eng Zort Multipartite géif ginn, wou op ville Plaze villes debattéiert gëtt.
Et wier awer natierlech net sou, dass näischt geschitt wier an de leschte Méint.

Zejoert goufen et zwee grouss Dossieren, eemol am Stolsecteur an eemol an der Aviatioun.

Iwwer Restrukturatioune wier een net zefridden, mä et hätt een et fäerdegbruecht, vill Aarbechtsplazen ofzesécheren, sou de Patrick Dury.

Corona huet och den LCGB-Kalenner duerchernee gerëselt. Ënner anerem de Kongress zejoert am Mäerz ass an d'Waasser gefall. Dee Kongress gëtt elo dëst Joer nogeholl, warscheinlech digital. De President Patrick Dury wäert do seng Kandidatur fir e weidert Mandat stellen.

Den LCGB, deen dëst Joer 100 Joer feiert, kritt och en neit Gebai um Belval. Déi aktuell Installatiounen am Stater Garer Quartier ginn awer bäibehalen.

Invité vun der Redaktioun: Patrick Dury

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu, op der App an am RTL Play ass d'Emissioun dono och am Replay ze fannen.