En Dënschdeg war d'Direktesch vum Prisong zu Schraasseg eis Invitée vun der Redaktioun.

Mat vill Energie a mat ville neien Iddien! Esou wëll déi nei Direktesch vum Prisong zu Schraasseg un hir nei Aarbecht erugoen. Dat sot d'Joke van der Stricht um Dënschdeg de Moien am RTL-Interview, si war eis Invitée vun der Redaktioun. Si ass diploméiert Kriminologin a schafft zanter 8 Joer am Prisong, déi lescht Joren als Directrice adjointe.

Enn 2022, Ugangs 2023 mat der Ouverture vum neie Prisong fir Untersuchungshäftlinge Uerschterhaff zu Suessem wäert sech villes änneren. Dann hätt een nämlech méi Plaz a Méiglechkeeten zu Schraasseg. Sou kéint een extra Sektioune virgesinn, fir „Primairen“, Leit déi eng éischte Kéier an de Prisong kommen. Och eng Geriatrie, eng speziell Sektioun fir eeler Leit, well d'Prisongspopulatioun géif ëmmer méi al ginn. Och d'Frae solle méi Plaz kréien.

Dernieft sinn e spezielle Block fir Leit mat Drogeproblemer a Privatzëmmere fir Detenuen, déi familiäre Besuch kréien, geplangt. Wéi gesot alles dat, wann den neie Prisong Uerschterhaff a gutt zwee Joer op geet.

D'Atelieren an d'Offer un Aarbecht sollen dann och ausgebaut ginn. 200 Plazen hätt een aktuell an den Atelieren. All Verurteelte muss schaffen. Wann Uerschterhaff bis op ass, sollen d'Atelieren iwwerschafft ginn, och dee fir d'Fraen. Déi musse separat schaffen an engem Atelier, wou se bitzen a botzen. Dat soll sech och verbesseren. Elo scho soll awer un enger Certificatioun vu Moduler, vu Formatiounen, geschafft ginn. Aktuell kann ee keng Ausbildung méi am Prisong maachen, wou een en unerkannten Diplom kritt.

Wat d'Corona-Pandemie ugeet: Och am Prisong géifen déi sanitär Mesuren applizéiert ginn. All Neizougang kéim 7 Deeg a Quarantaine a géif zweemol getest ginn, éier e bei de Rescht vun der Prisongspopulatioun däerf. Esou goufen 10 Infizéiert direkt am Ufank detektéiert.

Wéini Personal an Detenuen am Prisong kënne geimpft ginn, géif nach diskutéiert ginn. Et dierft awer déi selwecht Reiefolleg gëlle wéi fir jidderee soss.

Den Ament ass Schraasseg net iwwerbeluecht. Et läit ee bei 500 Detenuen mat enger Plaz fir 600. Aktuell wier kee Mineur am Prisong zu Schraasseg. Dës géifen och net dohinner gehéieren, sou déi perséinlech Meenung vun der neier Directrice Joke Van der Stricht. Et wier awer net an hirer Kompetenz fir kënne sécher ze soen, datt dat net méi vir kënnt.

Invité vun der Redaktioun: Joke Van der Stricht

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu, op der App an am RTL Play ass d'Emissioun dono och am Replay ze fannen.