En Donneschdeg war d'Presidentin vun der Fondation Cancer eis Invitée vun der Redaktioun.

All Dag kréie ronn 8 Leit hei am Land eng Kriibsdiagnos. Bal 3.000 nei Diagnose ginn et all Joer. Iwwer 13.000 Residente kämpfen de Moment géint de Kriibs. en Donneschdeg um Weltkriibsdag war d'Dr. Carole Bauer eis Invitée vun der Redaktioun. Si ass Onkologin am CHL a Presidentin vun der Fondation Cancer.

Zejoert wären 10% manner Diagnose gemaach gi wéi 2019, geet aus Zuele vum Staatslabo ervir. Dat wären awer villäicht 300 bis 500 Fäll, déi net entdeckt gi wären.

Och haut géife Leit nach zécken, fir bei den Dokter oder an d'Spidol ze kommen. Kriibskranker hätten den Ament zwou Ängschten, sot d'Dr. Bauer: nieft dem Kriibs och de Coronavirus. Déi Concernéiert géife sech och méi isoléieren, fir sech net unzestiechen. 

De Kriibs ass hei am Land déi zweetheefegst Doudesursaach am Land, no den Häerz-Kreeslaf-Erkrankungen. Preventioun ass wichteg. 40% vun de Kriibserkrankunge kéinte verhënnert ginn. Net fëmmen, manner Alkohol, beweegen, do wär nach Loft no uewen.

E weidere wichtege Punkt ass d'Fréierkennung. Och hei ass d'Angscht e Problem. Vill Leit fäerten, datt bei enger Kontroll eppes fonnt gëtt a kommen dowéinst net. Dobäi kéint een hautzedaags eppes géint déi meescht Kriibserkrankunge maachen, wann ee se fréi genuch entdeckt, sou d'Dr. Bauer.

Si huet och e kloren Appell gemaach un all d'Leit a Kriibskranker am speziellen, sech géint de Coronavirus impfen ze loossen. Kriibspatiente si „personnes vulnérables“ a kommen elo an der 2. Phas un d'Rei fir de Vaccin. Dat solle se och onbedéngt maachen.

Iwwert den Dag verdeelt, stelle mer d'Lutte géint de Kriibs an de Mëttelpunkt vum RTL-Programm um Radio mat ënner anerem dem Temoignage vun enger Fra, déi eng Kriibs-Diagnos krut, der Wichtegkeet vum Télévie, dem Dr Guy Berchem, deen iwwert d'Kriibs-Recherche schwätzt an dem psychologeschen Encadrement vun Kriibs-Kranken.

Invité vun der Redaktioun: Dr. Carole Bauer

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu, op der App an am RTL Play ass d'Emissioun dono och am Replay ze fannen.