E Freideg de Moie war den Intensiv-Medezinner am CHL eisen Invité vun der Redaktioun.

"Den November an Dezember waren extrem ustrengend. Souvill Patienten wéi mer op den Intensivstatioun haten a kënschtlech beotemt goufen, dat hate mer nach ni virdrun erlieft. D’Patienten waren an engem vill méi schlechten Zoustand, wéi nach bei der 1ter Well am Fréijoer".

Dat sot den Dr. Jean Reuter e Freideg de Moien als eisen Invité vun der Redaktioun. Hie schafft op der Intensivstatioun vum CHL.

Et hätt een 3x méi Patiente gehat wéi an der éischter Well.  Et wier ee kloer un d‘Limitte gestouss. D’Better wieren all besat gewiescht op der Intensivstatioun. Et hätten nei Better musse geschafe ginn, fir en intensiv-medezineschen Traitement kënnen ze leeschten.
An der Moyenne géifen Intensiv-Patiente ronn 2-3 Wochen op der Statioun leien. Wärend der Zweeter Well waren d'Patienten awer all méi krank, wa se bis an d'Spidol ageliwwert goufen. Do hätt ee méi dacks Eenzeler gehat, déi iwwer 2 Méint laang am Spidol hu musse behandelt ginn, sou den Dokter Reuter.

Laangzäit-Effete vum Covid

An der medezinescher Fachzäitschrëft „The Lancet“ gouf virun 3 Wochen eng chinesesch Etüd publizéiert, déi gewisen huet, dass 75 Prozent vun de Covid-Patienten, nach 6 Méint no hirer éischter Erkrankung, op d'mannst een Covid-Symptom haten. An dat wier souguer bei deene Patienten, déi net hospitaliséiert waren, an deemno och kee schwéiere Verlaf haten.

Vill Kollateral-Schied bei Net-Covid-Patienten

Mëttlerweil hätt sech d’Situatioun mat de Covid-Patienten awer generell verbessert. Et hätt ee just vill Retarden accumuléiert bei den net-Covid-Patienten, déi een elo versiche géing opzeschaffen. Scho wéi an der éischter Well, géing ee vill Kollateral-Schied konstatéieren. Also Leit déi wärend 2-3 Méint sech net consultéieren- an hir Krankheet schleefe gelooss hunn, an deemno och an engem méi schlëmmen Zoustand wieren.

Mutatioune maache Suergen

D’Mutatioune géifen awer Suerge maachen. Déi lescht Woche wiere rassurant gewiescht, well d'Personal an de Spideeler d'Gefill hat op engem Plateau ukomm ze sinn. Déi leescht Deeg géif awer besonnesch d'Situatioun am Departement Moselle Angscht maachen. Déi misst een am An behalen an um Qui-Vive sinn.  T’géif ee gesinn dass d’Zuelen nees lues unzéien. Wann dat just kleng Welle wieren, da kréich een dat gutt gereegelt.

Dexamethasone nach ëmmer Standard-Therapie

Den Dexamethasone ass nach ëmmer Standard-Therapie bei all Patient den hospitaliséiert ass an Sauerstoff brauch. Am Moment géingen et soss nach keng validéiert Medikamenter ginn. Ma dofir awer eng Rei Pisten, sou den Dokter. Nach gëschter hätt déi englesch Etüd Recovery nei Resultater iwwer d'Medikament Tocilizumab erausbruecht. Dat ass e Medikament wat d'Immunsystem beaflosst an am Zesummespill mat Dexamethasone wär duerch dëst Medikament d'Mortalitéit erofgaange. Dat wär keng spektakulär Baisse vun der Mortalitéit, mee et géing se erofsetzen. Do géing een nach op definitiv Resultater setzen.
Et géingen donieft awer och nach eng ganz Rei Etüde lafe fir d'Krankheet schonn an engem fréie Stadium ze beaflossen. Dat sinn ënner anerem Etüde mat monoklonalen Antikierper, erkläert den Dokter Jean Reuter.

Goufen d'Vaccinen ze séier developpéiert?

Mir wollte wëssen, wéi den Dokter Jean Reuter, op Deels och berechtegt Kriticken iwwert d'Vaccinen äntwert. Wärend den éischten 3-4 Méint hätte genuch Mënschen un den Etüden deelgeholl, fir statistesch signifikativ Resultater ze garantéieren.

Fir z'erklären, nennt den Dokter éischtens d'Beispill vum Vaccin géint Pneumokokken, dee bannent 3 Joer entwéckelt gouf. Et gëtt fir all Testphasen ëmmer ee Kontrollgrupp T- (den Grupp Placebo). An dem Grupp musse genuch Krankheeten optrieden, fir duerno eng statistesch Signifikativitéit ze hunn. Eng Infektioun mat Pneumokokken wär awer elo net sou heefeg, dofir hätt et 3 Joer gedauert, bis dass ee genuch Patienten an dem Grupp gehat hätt. Am Fall vum Covid-19 ass et natierlech esou, dass d'Krankheet immens heefeg ass, deemno hätt ee schonn no 3 Méint genuch Krankheeten am Placebo-Grupp gehat, fir mat statistescher Puissance ze soen, dass de Vaccin effikass ass, erkläert den Dr. Jean Reuter.

Dat Zweet wier, dass d'Pharmaindustrie eng gewëss finanziell Sécherheet garantéiert kritt hätt vun enger ganzer Rei Staaten, an deemno ganz séier hätt kéinten an der Matière avancéieren.
An dat lescht Argument vum Intensiv-Medezinner ass einfach ee Käschten/Notze Rapport. Wann ee wéisst, dass 75 Prozent vun de Leit no 6 Méint nach op d'mannst 1 Symptom hunn an een dës Info géint een Risiko géing opweie vun enger Impfung, déi trotz allem extrem gutt getest gi wär, do wär fir de Jean Reuter selwer op d'mannst keen Doute a wéi eng Richtung de Käschten/Notzen-Rapport géing tranchéieren.

Invité vun der Redaktioun: Dr. Jean Reuter

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu, op der App an am RTL Play ass d'Emissioun dono och am Replay ze fannen.