E Méindeg de Moie war den DP-Europadeputéierten eisen Invité vun der Redaktioun.

Ech wosst, datt d'Monica Semedo Schwieregkeete mam Personal hat an datt eng Prozedur géing lafen. Ma d'Detailer weess ech net, sou de Charles Goerens. Den DP-Europadeputéierte war e Méindeg de Moien Invité vun der Redaktioun an huet do d'Mobbing-Affär ronderëm seng Ex-Kollegin Monica Semedo kommentéiert.

Weder hien nach d'DP hätten den Oflaf vun der Prozedur dierfte stéieren, et hätt ee sech guer net kënnen amëschen oder parteiintern virzäiteg urteelen.

An deem Dossier wéisste just de Comité, d'Affer an d'Monica Semedo selwer Bescheed. D'Monica Semedo dierft wuel aus dem Rapport zitéieren, hätte Juristen dem Charles Goerens gesot. Si dierft graff soen ëm wat et géing, allerdéngs keng Nimm vun Affer nennen.

Déi Vuen, déi d'Monica Semedo dem Charles Goerens matgedeelt hätt, wiere wuel eesäiteg gewiescht a géinge sech net mat deem decken, wat de Comité zeréckbehalen hätt, sou de liberalen EU-Parlamentarier weider.

Datt d'Europadeputéiert Monica Semedo géing soen, DP-Leit Bescheed hätt Bescheed gewosst, domadder wéilt si warscheinlech vun hirer eegener Verantwortung oflenken.

Ech sinn traureg a schrecklech enttäuscht, sot den Europadeputéierte Charles Goerens weider. „Quel gâchis“, sou géing een dat op franséisch nennen. D’DP hätt d'Monica Semedo als Mënsch iwwregens net fale gelooss. Mä et kéint een och net erwaarden, datt bei de Liberalen lo eng “Party” gefeiert gëtt.
An sengen Aen dierft d’Monica Semedo net méi Member am Europaparlament bleiwen. Si wier op der Lëscht vun der DP gewielt ginn a sollt der Partei de Sëtz zeréck ginn, sou nach de Charles Goerens.

Invité vun der Redaktioun: Charles Goerens

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu, op der App an am RTL Play ass d'Emissioun dono och am Replay ze fannen.