En Donneschdeg de Moie war d'DP-Deputéiert eis Invitée vun der Redaktioun.

De Fonds pour l'emploi soll fir den Ersatzgehalt fir Independanten opkommen. Där Meenung war op jiddwer Fall d'DP-Deputéiert Carole Hartmann en Donneschdeg de Moien hei op RTL. Si stellt sech esou kloer géint d'Positioun vum Koalitiounspartner LSAP a vum OGBL, fir déi et net a Fro kënnt, datt de Fonds pour l’emploi dofir opkënnt, mee éischter d'"Mutalité des employeurs". Dorobber ugeschwat, sot d’Carole Hartmann, si wier „averstanen, datt ee muss doriwwer diskutéieren“, ob net awer eng nei Mutualitéit dat soss géing maachen.

Eng nei Mutualitéit opstelle géing Zäit brauchen, hat d'Patronat scho gewarnt. Bei der Diskussioun ëm den Ersatzgehalt fir d'Independante géing et der liberaler Ost-Deputéiert no souwisou éischter drëms goen, fir no der Corona-Kris e Mechanismus ze hunn. Aktuell géingen d’Pertë vun den Independanten duerch d'Erweiderung vun de finanziellen Hëllefen, déi d'Regierung op den Instanzewee bruecht huet, gedeckt ginn. Wichteg wier et, fir och no der Kris „Egalitéit“ tëscht den Independanten an de Salariéen ze schafen.

D’Carole Hartmann sot, beim Ersatzgehalt wier et net d'Zil, fir Leit, déi 10.000 Euro verdéngen, genee esou vill ze ginn, mee et misst limitéiert sinn: Genee wéi fir d'Salariéeën op 2,5 Mol de Mindestloun.

Affär HRS: „net ridicule“

Datt 3 Membere vum Verwaltungsrot vun den Hôpitaux Robert Schuman (HRS) scho Mëtt Januar geimpft goufen, huet d'Carole Hartmann „immens onglécklech“ fonnt. An der Impfstrategie wiere kloer Etappe virgesinn an zwar, datt als éischt dat medezinescht Personal, d'Personal generell an de Spideeler an Altersheemer an d'Leit aus den Alters- a Fleegeheemer. Bei HRS hätte sech elo Leit impfe gelooss, déi net un der Rei waren, sou d'DP-Deputéiert.

Am Géigesaz zum Michel Wurth (ee vun den 3 Membere vum Verwaltungsrot vun HRS, déi geimpft goufen), dee géigeniwwer Paperjam gemengt huet, déi ganz Affär wier „ridicule“, sot d'Carole Hartmann „ech fannen dat guer net ridicule, well mir sinn an engem System vu Solidaritéit“. Et soll ee sech drun halen an d’Prioritéite respektéieren.

Op d'Fro, ob déi Concernéiert sollen zerécktrieden, huet d'Carole Hartmann geäntwert, si wéilt sech „net amëschen“. Si missten dat selwer mat hirem Gewëssen ausmaachen an hir Konsequenzen draus zéien.

Affär Semedo: „no vir kucken”

An der Affär Semedo huet d'Politik dem Carole Hartmann no „kee gutt Bild“ ofginn. D'Moncia Semedo, déi wéinst Mobbing géint hir Assistente vum Europaparlament sanktionéiert gi war, huet d'DP am Sträit verlooss, well d'Partei hir vun enger Woch op déi aner de Réck net méi gestäipt huet. D'Monica Semedo seet och, si hätt d'Partei fréi informéiert, iwwerdeems d'DP-Féierung seet, si hätt näischt oder wéineg gewosst.

Huet also ee gelunn? „Nee, dat wëll ech net soen“, sou d'Carole Hartmann. Hirer Meenung no hätten déi Concernéiert Stellung geholl. Déi ganz Geschicht wier ze bedaueren, mee elo misst een „no vir kucken“.

D'DP ka geschwënn en neie Member vum Staatsrot designéieren. D'Carole Hartmann sot, si wier net Kandidatin. Si wéisst och net, wie sech scho gemellt huet. Op d'Fro, ob d'DP géing dem Monica Semedo e Sëtz am Staatsrot ubidden, fir de Sëtz am Europaparlament zeréckzekréien, huet d'Carole Hartmann gelaacht: „Ech ka mer dat net virstellen, well d'Monica Semedo ass jo net méi DP-Member“.

Invité vun der Redaktioun: Carole Hartmann

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu, op der App an am RTL Play ass d'Emissioun dono och am Replay ze fannen.