E Méindeg de Moie war den LSAP-Fraktiounschef eisen Invité vun der Redaktioun.

Et wier e gutt Beispill gewiescht, wéi een eng Pressekonferenz net mécht! Dat sot den LSAP-Fraktiounschef Georges Engel e Méindeg de Mueren am RTL-Interview. Et goung ëm d'Pressekonferenz vum Jean-Louis Schiltz am Kontext vun der Impf-Affär am Verwaltungsgrupp vun den Hôpitaux Robert Schuman. Et wier gutt gewiescht, wann ee sech do op d'mannst entschëllegt hätt.

Méi Kontrolle bei den Impfungen

D'Gesondheetsministesch Lenert wéilt d'Affär och net ënnert den Teppech kieren. Ma, si hätt genuch ze kontrolléieren, well och aus anere Spideeler an Impfzentere ginn esou Virfäll gemellt. Et wier eng "riseg Sauerei", datt Leit sech virdrécke beim Impfen a kee Kavaléiersdelikt, ënnersträicht de Georges Engel. D'Kontroll misst verschäerft ginn. An Däitschland soll eng Strof vu 25.000 Euro fir sougenannten „Impf-Vordrängler“ agefouert ginn. Hei am Land misst ee vläicht net sou wäit goen, ma et misst awer bestrooft ginn.

D'Impfcampagne kéint och nach weider acceleréiert ginn. Nei Erkenntnisser géife weisen, datt een den AstraZeneca-Vaccin direkt ganz kéint impfen, also guer keng Reserve misst méi halen.

Mir sollen iwwer een Ersatzgehalt fir Independanten diskutéieren

En anere Sujet mam Invité vun der Redaktioun war d'Propose vun der liberaler Deputéiert Carole Hartmann fir een Ersazgehalt fir Independanten ze schafen, deen aus dem Fonds pour l’emploi kéint bezuelt ginn. Dat wier dem LSAP-Fraktiounschef no, awer net ze realiséieren, well et net virgesinn ass. Dëse Fong géif nämlech aus der Solidaritéitssteier an dem Budget gespeist ginn an do kéint een net einfach esou Suen eraushuelen.

De Georges Engel fënnt d'Initiative vun der DP-Deputéiert awer gutt, fir de Sujet net falen ze loossen. Et misst iwwer een Ersatzgehalt diskutéiert ginn, ma et wieren aner Proposen um Dësch gewiescht, déi ganz gutt waren. Zum Beispill d'Propos vum Aarbechtsminister Dan Kersch fir eng Mutuelle ze schafen, wou déi grouss Betriber deene klenge gehollef hätten. Dës Initiative géing also op d'Solidaritéit tëscht den Entreprisë zielen. Op alle Fall misst ee sech an der Chamber nach eemol zesumme setzen an nei Initiativen huelen, sou de Georges Engel.

Sonndes am Commerce méi wéi 4 Stonne schaffen?

Déi liberal Deputéierter Carole Hartmann hat dann och am RTL-Interview d'lescht Woch proposéiert, fir am Commerce den Employéen d'Méiglechkeet ze ginn amplaz vu just 4 Stonnen, der 8 ze schaffen. Aktuell ass dat duerch d'Gesetz net méiglech. Ma et misst een och méi wäit denken, am Interessi vum soziale Liewen, dass d'Leit sech nees méi an Veräiner engagéieren oder Zäit kënne mat der Famill verbréngen. Mir schaffe fir ze liewen, a liewen net fir ze schaffen, sou de Georges Engel.

Den LSAP-Fraktiounschef konstatéiert, dass een och bannent der Koalitioun aner Vuë vertrëtt an d'DP hätt hei ganz kloer aus der Vue vun de Patrone geschwat. D'LSAP géing awer am Numm vun den Aarbechter, den Salariéen an de klenge Betriber, schwätzen. D'Decisioun, fir vun 4 op 8 Stonnen eropzegoen, kéint just duerch een Accord zesumme mat allen Partner geholl ginn.

Invité vun der Redaktioun: Georges Engel

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu, op der App an am RTL Play ass d'Emissioun dono och am Replay ze fannen.