E Mëttwoch de Moie war de President vum Le Conseil économique et social eisen Invité vun der Redaktioun.

De CES wier e Pilier vum Sozialdialog zu Lëtzebuerg. E rouege Pol, deen am Konsens vun de Sozialpartner geschaaft gouf. Wann dobaussen net vill géing vum CES geschwat ginn, da wär dat e gutt Zeechen, da géing ee seng Aarbecht an aller Rou maachen a sécherstellen, dass et e proppere Sozialdialog tëscht de Partner gëtt, sou den neie President Tom Dominique. Hie war e Mëttwoch de Moien eisen Invité vun der Redaktioun.

De Sozial- a Wirtschaftsrot gouf 1966 per Gesetz agefouert. Et ass eng Institutioun, déi der Regierung zur Säit steet, fir de Sozialdialog ze leeden an ze begleeden. All Joers mécht den CES e Rapport iwwer déi wirtschaftlech a sozial Situatioun am Land, a mécht och punktuell Avisen zu verschiddene Sujeten.

De Sozialdialog huet wärend der Kris net gelidden

D'Aarbecht am Wirtschafts- a Sozialrot wier gutt weider gelaf. De Sozialdialog hätt net gelidden. Ugangs vun der Pandemie wieren et vläicht praktesch Schwieregkeete ginn, fir de Sozialdialog oprecht z'erhalen an et wären och manner Avisen ausgeschafft gi wéi erwaart. Et wier awer och net d'Plaz, fir e Sozialkonflikt auszedroen, mä fir mat beluechten an iwwerluechten Argumenter ze diskutéieren. Deemno hätt den CES een héije Stellewäert, esou den Tom Dominique.

Leeft Lëtzebuerg 2030 an eng Rentemauer?

An engem Interview mam Paperjam hat sech de Virgänger vum Tom Dominique, de Jean-Jacques Rommes, ganz pessimistesch gewisen, wat den Rentesystem ugeet. Dës Ausso hätt hien awer net als fréiere President vum CES gemaach, mä à titre individuel, erkläert den Tom Dominique. Als Direkter vun der Inspection Générale de la Securité Sociale IGSS, wär hien och en charge, fir eng periodesch Evaluatioun vum Pensiounssystem ze maachen, an dës géingen elo nees fir Enn dëst Joer, ugangs nächst Joer ustoen.

Den neie President vum CES hat 2016 an engem Interview um Radio 100,7 och iwwer d'Rentemauer geschwat. D'Rentemauer ass jo een Desequiliber tëscht Recetten an Depensen, dee fir 2030 erwaart gëtt. Do sot den Tom Dominique, datt ee sech déi néideg Instrumenter ginn hätt, fir de System unzepassen. Zum Beispill mat engem Fonds de Compensation. Déi Mechanisme misste weider ausgeschafft ginn.

Aner wichteg Sujeten um Agenda vun der CES, wieren d'Nohaltegkeet an d'Digitalisatioun, esou nach de President vum Conseil économique et social.

Invité vun der Redaktioun: Tom Dominique

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.