En Donneschdeg de Moie war d'Inneministesch eis Invitée vun der Redaktioun.

Neien nationale Plang fir d'Organisatioun vum Rettungswiesen
Et wier eng Zort Kompass, no deem de CGDIS sech soll entwéckelen, esou d'Inneministesch Taina Bofferding.

Egal wou am Land, sollen d’Rettungsdéngschter maximal eng Véierelsstonn brauchen, fir op enger Onglécksplaz ze sinn. Dat ass d'Zil vum neien nationale Plang fir d'Organisatioun vum Rettungswiesen, kuerz PNOS. Et wier eng Zort Kompass, no deem de CGDIS sech soll entwéckelen, sot d'Inneministesch Taina Bofferding den Donneschdeg de Moien hei op der Antenn, si war eis Invitée vun der Redaktioun. Aktuell wieren d'Rettungsdéngschter an 78% vun de Fäll an ënner 15 Minutten op der Plaz, dat soll an Zukunft op 90-95% eropgeschrauft ginn an zwar flächendeckend. Am Norde vum Land sinn d'Distanze jo och alt mol méi wäit, ma genee dowéinst géing ee sech de PNOS och ginn. Fir iwwerall am Land de Service kënnen ze garantéieren. Aktuell leeft nach eng Consultatioun mat den 102 Gemengen, déi invitéiert sinn, an den nächsten 3 Méint (vum 1. Mäerz un) een Avis ofzeginn. Duerno ginn dës Avisen am Dokument verschafft, iert den neie Plang a Kraaft triede kann. "Et ass een Invest an déi zivil Sécherheet. Et ass een Invest an d'Leit," sou nach eis Invitée vun der Redaktioun, d'Taina Bofferding.

Vun Accidenter a Krankheete bis Canicullen an Tornadoen

De 500 Säite laange Plang mëscht een Inventar vun allen Zorte Risiken, mat deene mer hei am Land konfrontéiert ginn, fixéiert politesch Ziler a proposéiert Mesuren, fir dës Ziler kënnen z'erreechen, resuméiert d'Inneministesch.
Am Alldag wären d'Leit mat ville klengen an och groussen Erausfuerderunge konfrontéiert wéi Accidenter, akut Krankheeten. Donieft géifen et awer och méi aussergewéinlech Situatioune wéi Groussbränn, den Tornado 2019 awer och d'Pandemie. Da géingen awer och d'Canicullen, déi laang Drécheperioden a laang Periode vun extremer Keelt, wou ee vläicht net wierklech géing mengen, dass dat e Risiko kéint sinn, sou eis Invitée.

Donieft dierft een net vergiessen, dass d'Aktivitéite vum Rettungswiesen och an direkter Relatioun stinn zu der Unzuel u Leit, déi hei am Land wunnen an och all Dag iwwer eis Grenze schaffe kommen. Och d'Industrie géing sech virun entwéckelen an all déi Aspekter misst een a Betruecht zéien, sou d'Inneministesch.

"Zivil Sécherheet gëtt et net zum Null-Tarif"

"Ech wëll elo mol ganz däitlech soen, zivil Sécherheet, déi gëtt et net zum Null-Tarif," sou d'Taina Bofferding. Fir dës politesch Ziler ëmzesetzen, bräicht een an der Haaptsaach 3 Mëttelen: Personal, Infrastrukturen a finanziell Moyenen. De Budget géing deemno déi nächst Joren och ëm 8% gehéicht ginn, dat géing 10 Milliounen Euro d'Joer ausmaachen. Fir 2021 hat de CGDIS zum Beispill eppes méi wéi 133 Milliounen Euro zur Verfügung.

Formatioune sinn extrem wichteg

Et bräicht een, fir ze fonctionéieren, net just Leit, déi disponibel sinn, ma och Leit, déi déi richteg Formatiounen hunn a wéissten, wat ze maachen ass. Den nationale Plang fir d'Organisatioun vum Rettungswiese géing an deem Sënn op d'Wichtegkeet vun de Formatioune verweisen, ma diktéiert net de Contenu dovun. Formatioune wären ee permanenten Defi an eng permanent Aufgab, wou géing gekuckt ginn, wat et och vun internationale Recommandatioune gëtt. Zum Beispill bei Bränn vun Elektroautoen. Do hätt de CGDIS direkt reagéiert an d'Formatioun ugepasst. Do wär et wichteg, och weiderhin z'investéieren. De Pilier vum CGDIS wären awer och weiderhi Fräiwëlleger. Am PNOS ass och den Encadrement vu Fräiwëllegen definéiert.

CGDIS brauch nach Investissementer

De CGDIS gëtt am Juli eréischt 3 Joer al. Déi éischt Jore waren och gepräägt vu Pannen: am Informatik-System, wou Ambulanzerechnungen net mat der CNS ofgerechent goufen, ee Läsch-Gefier, wat um Feld bei engem Asaz verbrannt ass an och Industriebränn, déi zu Ëmweltverknaschtunge gefouert hunn. D'Diskussiounen, fir do nozebesseren, géingen awer nach à part gefouert ginn, präziséiert d'Inneministesch. Et misst ee bedenken, dass de GGDIS nach eng jonk Struktur ass, déi am Opbau ass an deemno och nach Investissementer brauch, sou d'Taina Bofferding.
D'Reform selwer wär awer och vun internationalen Experten ni a Fro gestallt ginn. Et wäre Recommandatioune gemaach ginn, zum Beispill fir déi intern Kommunikatioun ze verbesseren. An dorunner géing een och aktiv schaffen, sou d'Taina Bofferding.

Bis ewell 80% geimpft

En Donneschdeg de Muere gouf den nationale Plang fir d'Organisatioun vum Rettungswiesen och offiziell op enger Pressekonferenz presentéiert.

Um Bord dovunner, war gewuer ze ginn, datt nach net all d'CGDIS-Ekippe géint de Coronavirus geimpft sinn. Déi Leit, déi direkte Kontakt mat Patienten hunn, solle jo e Vaccin kréien. Notamment d'Ekippe vu Samu an Ambulanz. Dat wieren eng 1.500 Leit.

80% dovunner wiere bis ewell geimpft ginn. Sou heescht et vum CGDIS.

Invité vun der Redaktioun: Taina Bofferding

Reaktioun vun der Pompjeesfederatioun

Et wier de richtegen Plang fir d'Hëllef méi séier bei d'Leit ze kréien. Dat sot de Marc Mamer vun der Pompjeesfederatioun de 5. Mäerz am RTL-Moiesjournal.  Mat de Moyenen, déi een den Ament nach hätt,  wier dat awer schwéier ëmzesetzen. Dowéinst misst een och nees méi Fräiwëlleger fir d'Rettungsdéngschter motivéieren. An an deem Kontext wier et wichteg, den ablécklechen Zweeklassesystem ofzeschafen, wou déi eng 1 Euro d'Stonn kréien, déi aner awer Näischt.  Och méi a méi modern Infrastrukturen wieren néideg, esou de Marc Mamer vun der Pompjeesfederatioun.

D'Inneministesch Taina Bofferding hat an deem Kontext en Donneschdeg annoncéiert, datt de Budget déi nächst Joren soll ëm 8% erop gesat ginn. Dat géing 10 Milliounen Euro ausmaachen.

De kompletten Interview mam Marc Mamer

Offiziellt Schreiwes

Du secours endéans 15 minutes à travers tout le pays: Taina Bofferding présente le plan national d'organisation des secours (04.03.2021)
Communiqué par: ministère de l'Intérieur

«Mon but est de doter le Corps grand-ducal d'incendie et de secours, à travers le plan national d'organisation des secours, de moyens lui permettant dans le futur d'intervenir endéans 15 minutes partout dans le pays en cas d'urgence!»

C'est ainsi que la ministre de l'Intérieur, Taina Bofferding, a résumé la présentation, ce jeudi 4 mars 2021, du plan national d'organisation des secours (PNOS). La ministre a souligné que cette ambition a un coût, mais qu'elle représente aussi un investissement nécessaire dans la sécurité civile. Pour atteindre l'objectif phare du plan national d'organisation des secours et pour faire face aux risques potentiels y énumérés, il est impératif de disposer de ressources humaines suffisantes, d'infrastructures appropriées et de moyens financiers stables et prévisibles. La pierre angulaire du CGDIS restera toujours l'engagement volontaire des plus de 4.000 femmes et hommes qui devra être maintenu à tout prix.

Un premier projet de plan national d'organisation des services de secours (PNOSS) avait été élaboré en 2012, et ses conclusions ont alimenté les travaux relatifs au projet de loi 6861 ayant débouché sur la création du corps grand-ducal d'incendie et de secours. L'actuel PNOS qui tient compte des premières analyses faites jadis se situe dans le prolongement de la loi modifiée du 27 mars 2018 portant organisation de la sécurité civile ayant reformé les services de secours et créé le CGDIS.

En date du 1er mars 2021, le projet du plan national d'organisation des secours a été envoyé, entre autres, aux 102 communes du pays qui, dès lors, ont trois mois pour rendre leur avis sur ce document. Lors d'un webinaire qui aura lieu le 25 mars prochain, les élu-e-s locaux/-ales auront la possibilité de poser leurs questions en rapport avec le PNOS.

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.