En Donneschdeg de Moie war den FHL-President eisen Invité vun der Redaktioun.

Gutt 7.800 Leit am Spidolssecteur goufe geimpft, dat sinn 68% vum Personal. Dat geet net duer, sou de President vun der Spidolsfederatioun Paul Junk. 1300 Leit aus dem Spidols- an Fleegesecteur wéilten sech awer nodréiglech impfe loossen.

D'Infektiounszuelen zu Lëtzebuerg klammen an domat och d'Occupatioun vun de Spidolsbetter. Nei Variante wiere méi ustiechend, eng brittesch Etüd géing soen, datt déi brittesch Mutatioun och méi pathogen wier.

Ob eng drëtt Well kënnt oder net, dat kéint een net definitiv soen. Op alle Fall wier ee gutt opgestallt, et hätt een entretemps vill Erfarung zu Lëtzebuerg, sou den FHL-President. Allerdéngs wier et net ausgeschloss, datt an de Spideeler déi normal Aktivitéiten nees missten zeréckgefuer ginn.

Wat ass lass an de Robert-Schuman-Spideeler? Wéi ass zu den Impfunge vu Verwaltungsréit an zum Depart vum Direkter Claude Schummer ze soen? Hie géing Rumeuren héieren, ma déi géing hien net kommentéieren, genee sou wéineg wéi Internae vun engem Spidol, dat wier net säi Rôle, sou de Paul Junck.

Waren d'Konventioune mam Santésministère a punkto Impfungen dann ze vague? Esou d'Fro un de Paul Junck.  Hien äntwert, et wär natierlech ëmmer eng Saach vun Interpretatioun, wéi een e Vertrag liest. Datt den HRS-Grupp à part Vaccine soll bestallt hunn, dat kéint hie iwwregens net virstellen.

Invité vun der Redaktioun: Paul Junck

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.