E Mëttwoch de Moie war de Virolog eisen Invité vun der Redaktioun.

Schnelltester an der Schoul wiere wichteg, well d'Kanner jo déi Lescht wäerte sinn, déi geimpft ginn. Dat sot Virolog Thomas Dentzer, Responsabel fir alles, wat Tester ugeet, an der Covid-Krisen-Cellule vun der Regierung.

Bei engem Pilotprojet a verschiddene Schoule sollen elo Schnelltester an der Nues an den Asaz kommen, déi sougenannten „Nasenbohrer-Tests“ déi och an Éisträich schonn agesat ginn. Ouschtere soll en éischte Bilan gezu ginn. Den Zäitplang wier awer ofhängeg vun der Disponibilitéit vun den Tester. Et hätt een op alle Fall genuch bestallt: eng hallef Millioun sinn an der Commande. Déi éischt 200.000 sollen nach dës Woch kommen. Zil ass, datt sech herno jidderee selwer kann esou testen.

Fir d'éischt géing een also elo préiwen, wéi d'Tester sech verhalen, da géinge se och an anere Schoulen an den Asaz kommen. Et géingen awer nach vill aner Beräicher ginn, wou se kéinten an den Asaz kommen: zum Beispill an Alters- a Fleegeheemer fir d'Visitten oder esou, dass duerno jiddereen seng eege Responsabilitéit hëlt a se benotzt, wann en zum Beispill owes mat Kolleege wéilt een drénke goen.

Weiderhin op de Large Scale Testing setzen

Den Dr. Dentzer huet och ënnerstrach, datt de Large Scale Testing absolut Sënn géif maachen, trotz den héije Käschten. Op déi lescht 12 Méint gekuckt, géif Lëtzebuerg duerch dës Strategie besser an der Pandemie do stoen, wéi aner Länner. Am Juni hätten d'Restauranten an d'Caféen nees opgemaach, haut kéint een an de Buttek goen ouni RV. Am Ausland wär dat awer e ganzt anert Bild, präziséiert de Virolog. D'Kurv vun den Neiinfektioune géing och hei am Land ëmmer staark unzéien, ma dann awer och séier op engem Plateau ukommen. Mëttlerweil wär de Grand-Duché och zanter Woche stabel an dat trotz de Varianten, déi zanter Ufank November zirkuléieren, esou de Virolog.

Duerch Varianten: méi Leit am Spidol trotz konstanten Infektiounszuelen

Aktuell si 65 Prozent vun de Fäll hei am Land op déi brittesch Variant zeréckzeféieren a 16 Prozent op déi südafrikanesch. Eng rezent Etüd vun den Unien Exeter a Bristol hätt awer elo nogewisen, dass déi brittesch Variant 64 Prozent méi déidlech kéint sinn. Natierlech géing dat Suerge maachen, mä et hätt sech den Ament an Analysen nach net esou confirméiert. Par contre géingen nach ëmmer vill Leit am Spidol leien, obwuel d'Infektiounszuelen konstant sinn. Dat kéint op déi brittesch Variant zeréckzeféiere sinn, esou den Thomas Dentzer.
 
12 Prozent vun der Populatioun "immun"
D'Immunitéit géing all Woch an d'Luucht goen. Dat kéint een ënner anerem duerch déi serologesch Tester am Large Scale maachen. Am November wär een nach bei 6 Prozent gewiescht, am Januar scho bei 10 Prozent a mëttlerweil souguer bei 12 Prozent. Do géing een deemno och schonn den éischten Effet vu Leit gesinn, déi geimpft goufen. Ouni d'Impfunge wier ee warscheinlech bei 10 Prozent.

Dat géing dass ongeféier 62.000 Leit bis ewell mam Virus a Kontakt waren an wann een dat op de Large Scale géing zeréckbréngen, do hätt een bal 60.000 positiv Fäll bis ewell diagnostizéiert. Dat géing weisen dass d'Donkelziffer hei am Land immens geréng wier. Am Januar/Februar hätt een ongeféier, sengen Rechnungen no, 1,5 Prozent vun den positiven Fäll verpasst, sou den Virolog. Dat géing och hëllefen ze verstoen, firwat d'Kurven hei am Land sou séier op e Plateau kommen. Net wéi an anere Länner, sou nach den Thomas Dentzer.


70-90 Prozent vun den Geimpfte si geschützt
Am Ufank wär ee sech net sécher gewiescht, ob geimpfte Persounen nach kënnen infizéiert ginn. Mëttlerweil wieren awer besser Etüden do, an déi géinge weisen, dass 70-90 Prozent vun de Leit geschützt sinn. Déi géingen de Virus net méi kréien. Dat wär ganz rassurant. „Fir mech war dat déi wichtegsten Noriicht déi lescht 4 Wochen“, sou den Thomas Dentzer.

Et wär also nach eng kleng Méiglechkeet do, trotz der Impfung, de Virus weiderzeginn. Deemno ass et den Appell vun der Santé, sech trotz der Impfung och ëmmer nach am Kader vum Large Scale testen ze loossen.

Invité vun der Redaktioun: Thomas Dentzer

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.