E Méindeg de Moie war den Direkter vun der Enad eisen Invité vun der Redaktioun.

Mir hunn den Ament nëmmen d'Hallschent vun de Schüler do, well mir schonn no Allerhellegen op A/B-Klassen ëmgeklomme sinn. Dat sot den Direkter vun der Enad, der Ecole nationale pour adultes, de Jos Bertemes, am RTL-Interview um Méindeg de Moien.

Eng Erausfuerderung wär och, datt net all d'Schüler déi néideg technesch Mëttel hunn, fir Online-Coursen ze suivéieren oder ze printen. Pro Woch hätt een ongeféier ee positiven Covid-Fall.

D'Enad huet virun 10 Joer mat knapp 50 Schüler zu Péiteng ugefaangen, haut ass een zu Hollerech an huet iwwer 500 Schüler. D'nächst Joer sollen et der souguer 600 sinn. D'Demande klëmmt nämlech. Fir déi nächst Rentrée plënnert een op de Geesseknäppchen an déi provisoresch Struktur, wou och schonn den Athenée an de Michel Rodange waren.

D'Enad-Offer viséiert: Jonker, déi d'Schoul ofgebrach hunn. Jonker, déi net déi néideg Qualifikatioun hunn oder schoulesch oder berufflech weiderkomme wëllen. Et kann een d’Première nomaachen an et ginn och Ausbildungen z.B. als Educateur, Kach oder Elektriker offréiert.

D'Bezeechnung "Schoul vun der zweeter Chance" huet den Enad-Direkter iwwregens net gär. Vill Schüler hätten nämlech iwwerhaapt keng éischt Chance krut, esou nach de Jos Bertemes.

Den Duerchschnëttsalter vun de Schüler läit bei 21-22 Joer.

7% vun de Schüler géif een am Laf vum Joer verléieren, dat hänkt awer och vun de Formatiounen of. Zwee Joer laang mécht een de Suivi vun de Schüler. Iwwer 2/3 wären dee Moment an enger berufflecher Situatioun oder géife weider studéieren.

Invité vun der Redaktioun: Jos Bertemes

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.