En Dënschdeg war d'CSV-Fraktiounscheffin eis Invitée vun der Redaktioun.

Mir sinn a schwieregen Zäiten, dat hätte mer eis ganz gär erspuert. Mä de Kongress vum 24. Abrëll ass en Neiufank, mat enger neier Ekipp an da kucke mer zouversiichtlech an d’Zukunft. Dat sot d’CSV-Fraktiounscheffin Martine Hansen den Dënschdeg de Moien als eis Invitée vun der Redaktioun.

En externen Audit iwwert d’Finanze vun der CSV ass am gaangen, éischt Resultater solle virum Kongress virleien, fir der neier Ekipp e proppere Start z'erméiglechen, sou d’Martine Hansen. Bis e Freideg muss ee seng Kandidatur agereecht hunn, ënnert anerem fir d’Parteispëtzt. D’Martine Hansen konnt den Dënschdeg de Moien nach keng Nimm vu Kandidaten nennen. Si huet awer confirméiert, datt de Claude Wiseler am gaange wier, Gespréicher ze féieren, fir eng Ekipp zesummen ze kréien. Nach virum Freideg kéint dat neit Team virgestallt ginn. Eng Duebelspëtzt geet de Moment net, d’Statute gesinn dat net vir. Fir déi no Zukunft kéint een awer doriwwer nodenken.

D’Martine Hansen ass iwwregens an der Affär Frank Engel (nach) net gehéiert ginn. Mam Ex-Parteipresident huet si den Ament kee Kontakt méi. Si huet nach emol erkläert, datt een als Deputéierten eng Meldeflicht huet, fir eng méiglech Strofdot un de Parquet weider ze ginn. Méi hätt een net gemaach.

Transparenz géif heiansdo wéidoen, mä Gemauschels op laang Siicht vill méi, sou d’CSV-Fraktiounscheffin. Et kéint een net alles intern ënnert den Tapis kieren. Et misst ee sech un d’Gesetzer halen.

Invité vun der Redaktioun: Martine Hansen

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.