E Mëttwoch de Moie war den Deputéierte vun de Lénken eisen Invité vun der Redaktioun.

Duerch Corona hätte sech verschidde Problemer verschäerft, beim Logement, an de Betriber, zum Beispill an der Industrie. Dat sot den David Wagner de Mëttwoch de Moien am RTL-Interview.

De Politiker vun déi Lénk, deen den 19. Mee an der Chamber vum Nathalie Oberweis ersat gëtt, war eisen Invité vun der Redaktioun. Deen Dag réckelt och, dem Rotatiounsprinzip no, d'Myriam Cecchetti fir de Marc Baum am Süden no.
Datt een an enger Kris net alles perfekt maache kéint, wier legitim, sou den David Wagner de Mëttwoch de Moien. Et misst een awer d'Leit bei den Decisioune begleeden.

D'Regierung géif awer ze vill technokratesch vun uewen erof handelen. D'Responsabilitéit géif privatiséiert. De Staat an de Betriber dogéint sou mann wéi méiglech Verantwortung iwwerhuelen. Fir déi Lénk misst et genee ëmgedréit sinn. Besonnesch d'Ausgangsspär wier e graven Agrëff an d'Privatsphär an net an deem Mooss effikass. Par konter kéinten d'Leit awer weider schaffe goen a weider zu vill am ëffentlechen Transport fueren.

Si maache mir Angscht mat hirem Optimismus

Datt d'Lëtzebuerger Ekonomie d'Kris am Verglach gutt géif iwwerstoen, sou wéi de Finanz- an de Wirtschaftsminister et en Dënschdeg an der Chamber am Kader vun der Presentatioun vum Stabilitéits- a Wuesstemsprogramm presentéiert hunn, mengt den David Wagner net.

Dësen Optimismus vun der Regierung géif him Angscht maachen, sou eisen Invité de Mëttwoch de Moien. Déi plakeg Croissancezuele géifen net d'Realitéit um Terrain, d'Realitéit a ville Betriber erëmspigelen. Mat blanken Zuelen a Statistike kéint ee keng Politik maachen. Vill méi misst een d'Situatioun an de Betriber kucke goen. Vill wieren am Gaang, Drock auszeüben op hir Mataarbechter wéinst der Kris. An der Industrie haaptsächlech, mä och am Commerce.

Besonnesch Angscht huet den David Wagner awer och fir d'Jugend, déi keng Perspektiven hätt. An enger Aarbechtswelt, an där ee permanent an der Prekaritéit wier an engem Wunnengsmaart, op deem ee Loyere misst bezuelen, déi kee sech leeschte kéint, well d'Regierung mam Fanger am Mond nokucke géif. Op der anerer Hand géif hien awer grad an der haiteger Jugend en neit revolutionäert Potenzial bei den 20-Järege gesinn. Eng Jugend, déi immens vill wësse géif, gutt gebilt an informéiert wier an duerno keng Perspektiven hätt, fir normal ze liewen, a sou Situatioune géif et historesch gesi knuppen, sou den David Wagner an dat géif Hoffnung maachen.

Ech sinn e politesche Militant, deen heiansdo e Mandat iwwerhëlt

Den 19. Mee geet dem David Wagner säin Deputéiertemandat no 6 Joer op en Enn. Dat wéinst dem Rotatiounsprinzip bei déi Lénk. Et wier een ëmmer frustréiert, wann ee mat eppes misst ophalen, wat ee gär mécht a wat och spannend ass, mä hie wéilt awer weider politesch aktiv bleiwen. Och baussent der Chamber. Hien hätt 21 Joer laang virum Krautmaart scho Politik gemaach. Hie wéilt keng politesch Karriär maachen, mä wier e politesche Militant deen, well de System eben esou ass, heiansdo e Mandat iwwerhëlt oder soss Missiounen an der Partei. Ëm seng Successioun ass eisem Invité vun e Mëttwoch awer net baang. Si selwer géife weider am Hannergrond eng Hand mat upaken an déi zwee nei Deputéiert fir déi Lénk, d'Nathalie Oberweis an d'Myriam Cecchetti wieren elo schonn an de Fraktiounssëtzungen derbäi, fir lues an hir nei Aufgab erugefouert ze ginn. Si géifen dat bestëmmt gutt hikréien.

Mir sinn net iwwerall present, wou mer et misste sinn

Intern wëll sech den David Wagner an nächster Zäit besonnesch op eng Reorganisatioun bei déi Lénk konzentréieren. Déi Lénk sinn amgaang, sech selwer a Fro ze stellen. D'Partei géif net alles maachen, wéi se et misst maachen, wier beispillsweis net genuch verankert an der traditioneller Aarbechterklass. Dat wëll den David Wagner änneren. Et missten och "Caissièren" bei déi Lénk vertruede sinn.

Invité vun der Redaktioun: David Wagner

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.