E Méindeg de Moie war de Generaldirekter vun der Chambre des métiers eisen Invité vun der Redaktioun.

De wirtschaftleche Gesondheetszoustand vum Handwierk kann een net an engem Saz resuméieren. Global gesinn, huet d'Handwierk an der Kris relativ gutt resistéiert. Mat ronn 8.000 Betriber an 100.000 Salariéë géif een trotz Corona bei den Aarbechtsplazen an der Zuel u Betriber eng Croissance gesinn. Et wier ee widderstandsfäeg. Dat sot de Generaldirekter vun der Chambre des métiers e Méindeg de Moien als eisen Invité vun der Redaktioun. Netto hu sech zejoert eng 253 nei Betriber gegrënnt an et goufen eng 1.500 Aarbechtsplaze geschaaft, wat awer bedeitend manner ass, wéi déi aner Joren, präziséiert den Tom Wirion. Soss louch ee bei iwwer 3.000 neien Emploien am Joer, deemno waren et duerch d'Pandemie -53 Prozent manner an der Kreatioun vun neien Aarbechtsplazen an -21 Prozent bei der Kreatioun vun neie Betriber.

Liewensmëttel-Handwierk a Soins à la personne hu staark gelidden

Et géifen awer staark Ënnerscheeder jee no Secteur ginn. Méi uerg gebeidelt gouf beispillsweis d’Liewensmëttel-Handwierk mat engem Réckgang vum Chiffre d'affaires en Moyenne vun -16 Prozent, e Réckgang vun der Unzuel vu Betriber vun -3 Prozent an -5 Prozent manner Emploi. Een anere Secteur, dee staark getraff gouf, ass dee vun de Soins à la personne – Coiffure - Esthétique, do gouf et e Réckgang vum Chiffre d'affaires vun 21 Prozent. Besser – oder „net esou schlecht“, wéi de Generaldirekter präziséiert, goung et dogéint am Bau. Dat géing sech doduerch erklären, dass se zwar och am Ufank hu mussen zoumaachen, mee duerno konnte si sech rattrapéieren. Wann awer elo e Client 2 Méint net beim Coiffeur war, kann de Coiffeur duerno net déi 2 Méint rattrapéieren, sou den Invité. De Bau huet een Zouwuess am Emploi an, an der Kreatioun vun neie Betriber vun 3 Prozent, ma trotzdeem e Réckgang vum Chiffre d'affaires an der Moyenne vu 6 Prozent, ënner anerem och duerch d'Ëmsetze vun de sanitäre Mesuren. Doduerch ass eng Perte an der Produktivitéit an am Rendement entstanen.

Corona-Aiden vum Staat ware ganz wichteg

D'Aidë spillen eng grouss Roll. 89 Prozent vun de Betriber hunn an enger Enquête uginn, dass si op staatlech Hëllefen zeréckgegraff hunn.

Mat 100.000 Salariéen am Handwierk, war de Chômage partiel natierlech eng vun de gefrotesten Aiden, mat 84 Prozent, déi dovunner profitéiert hunn. 39 Prozent hunn och eng Aide directe ugefrot.

„Aiden si wichteg, mee ginn net duer“, präziséiert de Generaldirekter vun der Chambre des métiers. 43 Prozent vun de Chefs d'entreprise hunn nämlech mussen an d'Reserv goen oder eng Augmentation de capital maachen. D'Aidë sinn net an all Secteur duergaangen. De Staat kéint natierlech och net alles opfänken.

Wéi kann een den Post-Corona geréieren?

Bei de Vaccinatioune misst een elo nach besser a méi séier virukommen. D'Schnelltester kéinten awer och e wichtegen Outil sinn, fir méi séier nees zeréck an eng gewëssen Normalitéit ze kommen, sou den Invité. Donieft misst ee besonnesch an deene Secteuren, déi nach op Aiden ugewise sinn, net abrupt vun haut op muer domadder ophalen, mee en doucen „Phasing Out“ oder Transitioun preparéieren, soss hätt ee sech déi Méi mat den Aiden iwwerhaapt net misse maachen.

Enkpäss vu Baumaterial

„Et huet een et gesi kommen“, sot de Generaldirekter vun der Chambre des métiers. Rieds ass vun den Enkpäss u Baumaterial, déi virun allem duerch d'Pandemie ausgeléist goufen. Den Ament géing et ganz massiv un Holz, Stol an Isolatiounsmaterial feelen. Engersäits hänkt et do un den Délais de livraison, wou d'Material net erbäikënnt an een net ka schaffen, an anerersäits eng grousse Hausse vun de Präisser.

De Konjunkturcomité géing sech elo dofir asetzen, dass een an deene Betriber, wou doduerch net ka geschafft ginn, dierf op de Chômage partiel zeréckgräifen. Dat vu Mëtt Mee un an och nach am Juni. Et wier schliisslech ee Cas de force majeur, sou den Tom Wirion. Donieft wier een och frou, wann um ëffentleche Marché beim Decompte final, zum Schluss vum Chantier, eng Präis-Revisioun ze maachen. Wann ee Chantier laang dauert, kéint een dat och scho bei den Acompte maachen. Et wier e reelle Problem, well een dat virum Covid net hätt kënne virausgesinn. Um Privatmarché misst een am Endeffekt Léisunge mam Client fannen.

Wéi laang dës Präisdeierecht an d'Enkpäss nach undaueren, kéint een den Ament net soen, dat wier Spekulatioun, sou den Tom Wirion.

Eng selektiv Corona-Steier?

Mir sinn nach net aus der Pandemie eraus an iert ee generell kuckt, wéi et mat de Staatsfinanzen ausgesäit a mam Defizit a wéi een do kann erauskommen, misst een elo mol kucken, fir zesumme mam Secteur esou séier a sou gutt wéi méiglech aus der Situatioun erauszekommen. „Chaque chose à son temps“, sou nach de Generaldirekter vun der Chambre des métiers, Tom Wirion.

Invité vun der Redaktioun: Tom Wirion

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.