E Méindeg war de President vun der Dokteschassociatioun eisen Invité vun der Redaktioun.

Dezentral medezinesch Strukture sinn néideg. Mä beim geplangten Zenter zu Jonglënster géif e Konzept feelen. Dat, well de Projet vu Leit ausgeschafft gouf, déi net onbedéngt wéissten, wat gebraucht gëtt.  Dat sot de President vun der Dokter an Zänndokter-Associatioun AMMD Dr. Alain Schmit.

Seng Kritik riicht sech och un d'Verwaltungsréit vun de Spideeler, déi dacks net mat Medezinner oder anere Gesondheetsberuffer besat sinn. Et bräicht een eng gescheit Zesummesetzung vun de Verwaltungsréit.

De Projet Jonglënster wier op Basis vun enger politescher Volontéit, zesumme mat engem private Financier, der Fondatioun HRS, ausgeschafft ginn. Dat vu Leit, déi net aus dem Beruff sinn. Sou kéint en Interessekonflikt entstoen, fäert den Dr Schmit.

Geplangt ass de Moment zu Jonglënster, datt d’Gemeng den Terrain stellt. D’Fondatioun vun den Hôpitaux Robert Schuman géif bauen an HRS, also d’Spidol Kierchbierg, géif d’Gerance maachen. Sou eng dezentral, medezinesch Struktur misst awer vun Dokteren ausgoen, net vum Financier oder vun der Gemeng, kritiséiert den AMMD-President.

D’Doktere géifen hoffen, datt e gescheit Gesetz kënnt fir den Extra-Hospitalier, wou d’Gesondheetsberuffer méi Matsproocherecht kréien. Allgemeng bräicht Lëtzebuerg eng Vereinfachung vun de Spidolsstrukturen. Ambulant Strukturen, déi vun de Gesondheetsberuffer gedroe ginn an eng Vernetzung vu béide Strukturen, fir datt de Patient beschtméiglech versuergt gëtt, seet den AMMD-President Dr Alain Schmit.

Invité vun der Redaktioun: Dr. Alain Schmit

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.