En Dënschdeg de Moie war den Diddelenger Deputé-maire eisen Invité vun der Redaktioun.

Den Industriestanduert Diddeleng mécht eng schwiereg Zäit mat an dat mécht mer Suergen. Dat sot den Diddelenger Député-maire Dan Biancalana um Dënschdeg de Moien, hie war eisen Invité vun der Redaktioun.

De Glasproduzent Guardian mécht definitiv zu Diddeleng zou an d’Schmelz Liberty Steel riskéiert eng Faillite. 250 Aarbechtsplaze stinn hei um Spill.

Bei Liberty Steel hofft de Buergermeeschter, datt de Staat aspréngt.

Diddeleng a seng zwou Industriezonen dierften net vergiess ginn. Notamment bei Wirtschaftsreesen, wou auslännesch Investisseure sollen iwwerzeegt ginn. Et wéilt een d'Industrie onbedéngt halen. Dowéinst wier ee frou, datt rezent Tensioune bei Eurofoil konnte bäigeluecht ginn.

Diversifikatioun wier awer och wichteg: den Nationallaboratoire mat sengen neie Branchen an d'Logistik zum Beispill wiere weider Standbeen.

Och wat de Logement ugeet, wier ee ganz aktiv. Notamment mam neie grousse Quartier Neischmelz. Hei sollen eng 1.000 Wunnunitéiten entstoen. An den nächsten 10-15 Joer. Modernitéit an industrielle Patrimoine géif ee verbannen. Elo scho wéilt een awer Liewen um Site an hätt Gemeinschaftsgäert, Kultur-a Sportsaktivitéiten an och fir d’Kulturjoer 2022 géif een de Site notzen. Et wär keng Optioun eng Schlofgemeng ze ginn, sou den Dan Biancalana.

Wat d‘Kriminalitéit ugeet, wär Diddeleng generell gesinn eng sécher Stad. Et géife keng Brennpunkter gi wéi anerwäerts. Natierlech wär een awer mat iwwer 21.000 Awunner keng Insel.

Den Asaz vu private Sécherheetsfirmaen gesäit den Diddelenger Buergermeeschter éischter kritesch. Sécherheet soll an der Hand vun der Police bleiwen.

Invité vun der Redaktioun: Dan Biancalana

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.