E Mëttwoch de Moie war de CEO vun der Luxair eisen Invité vun der Redaktioun.

D'Luxair hätt e Polster gehat, och de Staat hätt gehollef. Esou hätt een d'Krisejoer 2020 iwwerstanen. Dat sot de CEO vun der nationaler Fluchgesellschaft, de Gilles Feith, am RTL-Interview, hie war e Mëttwoch de Moien eisen Invité vun der Redaktioun.

Bal 155 Milliounen Euro Perte huet d'Luxair zejoert gemaach. Et goufe 70% manner Passagéier. Praktesch all d'Liquiditéiten an der Firma wieren opgebraucht. Et wär eng ganz schwiereg Situatioun an d’Gesellschaft misst kucken, nees op d’Been ze kommen. Ausdauer a Motivatioun wären d’Stéchwierder.

Vill Leit vum Personal misste vum Chômage partiel profitéieren, bedauert de Luxair-Direkter. Eng 600 Leit wieren deels zwar just fir eng Zäit vu Mesurë vum Plan de Maintien dans l'emploi concernéiert. De Cargo-Zenter hat zwar méi Aarbecht, mä huet och eng Perte vun 10 Milliounen Euro gemaach. Dat wéinst héije Personalkäschten, sou d'Prezisioune vum Gilles Feith. De Cargo-Beräich géif aktuell awer nees liicht schwaarz Zuele schreiwen.

Fir dëst Joer wier ee virsiichteg optimistesch. Bei der Airline géif op Diversifikatioun gesat ginn. Et misst een „d'Eeër a vill Kierf leeën“. Verschidde klassesch Destinatioune géifen de Moment net funktionéieren, wéi München zum Beispill, wou een aktuell méi einfach mam Auto hikënnt. Dofir goufen neier fonnt, wéi Dubai, Bukarest, Stockholm oder Usedom. 85 Destinatioune steiert een un. D'Fligere misste fléien, soss géife se keen Euro erabréngen, sou de Luxair-Direkter.

An der Aviatioun misst ee jo en negativen Test virleeën, dat wär vill Opwand a Méikäschte fir LuxairTours an och eng Benodeelegung par Rapport zu den anere Verkéiersmëttelen, fënnt de Gilles Feith.

Op d‘“Kippchen“ am Fliger ugeschwat, huet de Luxair-Chef erkläert, datt ee fir ze spueren all d’Käschten huet misse kucken – ouni Ausnam. Wann een awer eng flott Kollaboratioun mat de Wënzer géif fannen, wär hie méi wéi frou, fir nees Lëtzebuerger Cremant unzebidden.

Invité vun der Redaktioun: Gilles Feith

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.