E Freideg de Moie war den Ombudsman fir Kanner a Jugendlecher eisen Invité vun der Redaktioun.

Den Ombudsman fir d’Kanner a Jugendlecher bedauert, datt zanter 2018 keng Zuelen iwwert d’Infraktioune vu Jugendleche publizéiert ginn. De Charel Schmit sot um Freideg de Moien hei op RTL, datt een ouni déi „richteg Zuelen“ keng sachlech Debatt kéint féieren. Den Zuele vun 2013 bis 2017 no, wier op jiddwer Fall keng nennenswäert Verschlechterung ginn. Et dierf ee sech awer net duerch eenzel Faits divers’en „dreiwe loossen“ well dat géing eng onglécklech Atmosphär schafen, andeems eng ganz Generatioun reduzéiert gëtt op ee strofrechtlecht Verhalen.

Wat de Cybermobbing ugeet, huet de Charel Schmit virun engem "Tsunami vun der Digitaliséierung" gewarnt, wann elo deconfinéiert gëtt, well een eréischt de Schued géing gesinn, wann d’Waasser zeréckgeet. Laut enger Etüd hätt een Drëttel vun de Kanner d’Erfarung als Affer oder Täter vu Mobbing matgemaach.

Ugeschwat op d'Aussoe vun der Stater Buergermeeschtesch Lydie Polfer, datt Mannerjäreger, déi illegal hei am Land wiere Verbrieche beginn, sot den Ombudsman fir d’Kanner, et bräicht een hei kreativ Léisungen. Et misst ee Programmer ubidde fir déi Jonk aus där Logik erauszekréien. Et misst een all Fall „au cas par cas“ analyséieren, mä dat am ieweschten Intérêt vum Kand.

Staark Tendenze vu „law and order” verspiert de Charel Schmit iwwerdeems net an der Politik. Repressioun wier eng vun de méigleche sozialen Äntwerten. D’Erausfuerderung wier awer déi, sech e legale Kader ze ginn, deen de Jonke fir seng Doten responsabiliséiert. Doropshi misst awer eng Resozialiséierung, eng Rehabilitéierung kommen. Eréischt wann all aner Méiglechkeeten ausgeschöpft sinn an net gewierkt hunn, kéint ee repressiv sinn, sou de Charel Schmit. An do misst een oppassen, datt ee keng „Mëschpopulatioun“ schaaft. Well d’zoue Struktur zu Dräibuer, d’Unisec, dat wier kloer „e Kanner- a Jugendprisong“.

Invité vun der Redaktioun: Charel Schmit

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.