E Mëttwoch de Moie war den Direkter vun der Chambre de Commerce eisen Invité vun der Redaktioun.

D'Economie huet sech vun der Corona-Kris erkritt, d’Zuele géingen dat weisen, esou den Direkter vun der Chambre de Commerce e Mëttwoch de Moien hei op RTL. De Carlo Thelen sot awer och, déi positiv Entwécklung wier vu Secteur zu Secteur ënnerschiddlech.

Déi grouss Well vu Faillitte wier nach net komm, mä se kéint senger Meenung no nach kommen. De ganze „Kassensturz“ vun der Kris géing eréischt gemaach ginn, mä de Carlo Thelen huet betount, d’Hëllefen dierften net ze „abrupt“ auslafen. Donieft huet de Patronatsvertrieder gewarnt, datt wann eng Indextranche nach um Enn vum Joer erfale géing, sou wéi de Statec et virausseet, dat nach weider Käschte fir d’Betriber géing duerstellen. Et misst een oppassen, datt een d’Reprise net erstéckt.

Autonomie beim Approvisionnement

D'Präishausse bei de Matière premièren riskéiert allerdéngs der ekonomescher Reprise Steng an de Wee ze leeën, sou de Carlo Thelen. Präisser vun eenzelen Matièren si bis zu 400% explodéiert. Hie fäert, datt d'Präishaussen och beim Client wäerten ukommen. De Manktem u Matière première an d’Präishausse als Konsequenz, wieren net nëmmen op d’Pandemie zeréckzeféieren, mä och op schlecht Wiederkonditounen oder geopolitesch Tensiounen. De Carlo Thelen huet och d‘Handelskricher tëscht Länner ernimmt, oder nach déi grouss Holzdemande an den USA oder Stauen an de Liwwerketten.

Europa hätt et verpasst selwer genuch Matière première ze schafen, respektiv ze sécheren. Dat wier elo déi grouss Erausfuerderung fir d'EU, déi awer net kuerzfristeg kéint gemeeschtert ginn. Den Direkter vun der Chambre de Commerce huet awer begréisst, datt d’EU d’Allianz vun de Matière Premièren lancéiert huet. Europa misst beim Approvisionnement op jiddwer Fall méi onofhängeg ginn. Als kleng Export-Wirtschaft kéint Lëtzebuerg net vill maachen, huet de Carlo Thelen gemengt.

Invité vun der Redaktioun: Carlo Thelen

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.