En Donneschdeg de Moie war d'Direktesch vum Cepas, dem Centre psychosocial et d’accompagnement scolaires eis Invitée vun der Redaktioun.

Deene meeschte Jonken geet et zu Lëtzebuerg gutt, well et dem Land och net schlecht geet. Dat gëtt eng gutt Basis fir no deenen ze kucken, deenen et net sou gutt geet, sou d‘Nathalie Keipes vum Cepas, dem Centre psychosocial et d’accompagnement scolaires iwwert de leschte Jugendbericht, deen e Mëttwoch presentéiert gouf. D’Nathalie Keipes war en Donneschdeg de Moien Invitée vun der Redaktioun hei op RTL. Si huet erkläert, datt grad wéi an anere Länner, een och hei am Land géing gesinn, datt Jonker aus defavoriséierte Milieue méi Schwieregkeeten hunn. Dat well déi Jonk aus deene Milieuen och net déi Moyenen oder dat Ëmfeld hunn, wat no hinne ka kucken. Der Uni Lëtzebuerg no wier et manner de Migratiounshannergrond a méi de soziale Milieu, deen op d'Wuelbefanne vun de Jonken dréckt.

Aus dem Jugendbericht soll de Ministère jo konkret Mesuren schöpfen, déi an de Jugendpakt solle fléissen, deen am Hierscht soll virleien. Zil wier et, deene Jonken „besser zur Säit“ ze stoen, sief et an der Schoul oder baussent der Schoul, sou d’Nathalie Keipes. Och d’Elteren an aner Bezuchspersoune missten dat maachen, an hei wéilt ee konkret weider op d‘“Eltereschoul“ setzen, wou den Dialog gestäerkt gëtt.

Ee weidere Constat aus dem Jugendbericht wier, datt de Leeschtungsdrock géing klammen. Vun de Jonke géing erwaart ginn, datt se performant sinn, wat och erkläre géing, firwat de Schoulstress an d’Luucht gaange wier. Dem Nathalie Keipes no wieren déi Jonk an deene leschten 10 oder 20 Joer och ëmmer méi an der digitaler Welt ënnerwee an do géing och e Bild verkierpert ginn, dat net der Realitéit géing entspriechen, mä éischter zousätzlechen Drock géing maachen.

Hei kéint den Educatiounsministère zum Beispill dofir suergen, datt d'Schoule méi participativ sinn an datt d’Schüler do méi kënne matschwätzen. Dat wier näischt Neits, mä de Jugendbericht géing bestätegen, datt ee weider misst op déi Approche setzen. Am Hierscht soll iwwregens en „Dag vun der Demokratie“ agefouert ginn, sou d’Nathalie Keipes. Op d’Fro, ob net ëmmer déi selwecht, déi motivéiertst Schüler méi partizipativ sinn an anerer marginaliséiert sinn, huet d’Direktesch vum Cepas geäntwert: „Et huet vill mat Informatioun a mat Encouragement ze dinn“.

Invité vun der Redaktioun: Nathalie Keipes

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.